Illersuisuuneqalerneratigut illersuisuusartut iliniartitaanerat aaqqissuussaanerulissaaq
Pinerluttulerinermi inatsisip januaarip aallaqqaataani 2010-mi atuutilermat, nunatsinni illersuiusuuneqalersinnaanera aammaanneqarpoq. Ukiullu arfineq marluk qaangiuttullu atorfik inuttaqalermat illersuisut peqatigiiffianniit isumalluarnarteqaat.
AAMMA ATUARUK Kalaallit Nunaat siullerpaamik illersuisuunertaarpoq
- Uagut illersuisuusartut Kalaallit Nunaanni sinnerlugit assut tulluusimaarpugut taanna periarfissaq kiisami piviusunngormat, Tom Ostermann taama oqarpoq.
Nunatsinni illersuisuusartut illersuisuunermiit pitsaasumik maanna ilinniartinneqartalernissartik Tom Ostermannip qilanaarutigaa:
- Ulluinnarput uagut aamma ilaatigut unamminartoqaqigami illersuisutut sulinermi taamaattumik ilinniartitaanerput aaqqissuunneqqaqqinnissaanut assut uagut aamma peqatigiiffimmiit isummersoqataallutalu immersueqataassaagut soorunami, Ostermann taama oqarpoq.
Illersuisutut atukkat pitsaanerulissapput
Nuannaarutissaqartulli taakkuinnaanngillat. Inuit Ataqatigiimmi ukiuni taakkunani nunatsinni illersuisuuneqalernissaannik aamma anguniagaqartuarnikuupput.
Inuit Ataqatigiit sinnerlugit folketingimi ilaasortap Aaja Chemnitz Larsenip tikuarpaa, unnerluussisussaatitaasut, inatsisilerituujusut politiit eqqarttussivinni saqqummiussinissaannut ullumikkut ikorfartorluarneqartartut. Maannalu illersuisuuneqalerneratigut illersuisuusartut aamma ikorfartorneqarsinnaanngortut.
- Illersuisuuneqalerneratigut illersuineq aaqqissuussaanerusumik piareersarneqarsinnaavoq. Sulinermi atukkat illersuisutullu atukkat nalinginnaasut pitsanngorsarneqarsinnaapput. Tassa tamakkua atorfimmik pilersitsinermi neriuutikka, Aaja Chemnitz Larsen taama oqarpoq.