Illersuisut: Nuummi inissiisarfimmiittut sumiginnarneqarput

Taama ajornartorsiuteqarneq Pinerluttunik Isumaginnittioqarfiup pisortaata toqqorteraalusooq, Illersuisut Peqatigiiffiannit oqaatigineqarpoq.

- Ineeqqani inummut ataatsimut naatsortuussani inuit marluk ulloq naallugu mattusimaneqartarneri, kialluunniit naatsorsuutigisinnaavaa tamanna inuup tarniganut qanoq tamassuma sunniuteqartarnissaa.

Pinerlussimasunut inissiisarfimmi Nuummiittumi inissinneqarsimasut sivisuumik ineeqqani mattusimaneqartarneri pillugit, Illersuisut Peqatigiiffianni siulersuisuunernut ilaasortaq, Tom Ostermann taama oqarpoq.

Inissiisarfiit immikkoortuini isumannaallisakkani ineeqqani mattusimatitsisarneq akuerineqarsinnaanngitsoq aamma kimilluunniit oqaloqatiginnittoqarsinnaananilu takunniarneqarsinnaanngitsutullu inissinneqartarnermut tamanna assigusoq, eqqartuussisuserisoq, Finn Meinel oqarpoq.

- Tassa imaappoq ineeqqaminniittarput ulloq unnuarlu, taamaallaat nalunaaquttap akunnerata affaani pisuttuartinneqartarneri eqqaassanngikkaani. Inissiisarfimmi isumannaallisakkamiittut ullaakkut arfineq marlunut iterunik, taakku piumasarisinnaavaat isumannaallisakkamiitoqatertik ullup ingerlanerani pulaarsinnaallugu, kisianni isumannaallisagaq qimannagu taamaaliorsinnaallutik.

Finn Meinel taama oqarpoq. Inissinneqarnerup nalaani Finn Meinelip sullitani arlallit sinnerlugit, taama atugassaqartinneqartarneri, Pinerluttunik Isumaginnittoqarfimmut qaammatip arlallit matuma siornali naammagittaalliutigisareeraluarpaa. Finn Meinelip illersugaasa ilaat qaammatit arlallit ataqatigiittumik ineeqqani mattusimatinneqartarsimasut taassuma oqaatigaa.

- Ineeqqani mattusimaneqartartut tarnimikkut artorsalinnginnissaat pillugu pissutsinik iluarsiisoqannginnera ajornartorsiutaasvoq. Soorlu Pinerluttunik Isumaginnittoarfiup tungaaniit tarnip nakorsaanik misissuisoqartitsineq ajorpoq aamma suffissaqarnissaannik atuartinneqarnissaannilluunniit eqqarsartoqarneq ajorpoq. Tassa inissinneqartut iigaq kisiat nakkussinnaavaat qarasaasiaqarunilluunniit qarasaasiaq kisiat sukisaarsaatigisinnaallugu, allamik naamik.

Ullut 14-it sinnerlugit ineeqqani mattusimatinneqarnermik pineqaatissinneqarsimasut inatsisit malillugit tamakkuninnga atugassaqartinneqartinneqartartussaagaluartut, Finn Meinelip oqaatigaa.

Ineeqqani mattusimaneqartartut ukiuni kingullerni amerliartorsimasut aammalu tamassuma atugaanerata peqqarniinnerulersimanera, Finn Meinel aamma Tom Ostermann isumaqarput.

- Ukiuni kingullerni marluni ajornartorsiutip annertusiartuinnarnera malunnarpoq. Aamma pinerlussimasut ulloq naallugu mattusimatinneqartarneri aamma isersimasoqatiminnik pulaagaqarniarunik aatsaat siumoortumik tamanna qinnutigereerpassuk taamaaliortoqarsinnaanera isumaqarpunga isornartorsiortariaqartoq.

Tom Ostermann oqarpoq. Taannalu isumaqarpoq Pinertuttunik Isumaginnittoqarfiup pissutsit ajornartorsiutaaneri nipaarsaarukkaat.

- Pinerluttunik Isumaginnittoqarfiup iluani pitsanngorsaanerit suliniutuillu assigiinngitsut taakkartorneqartut, kusassagaasumillusooq oqariartuutigineqarneri isumaga malillugu ataqatigiinngittoqarneranik takussutissiipput.

Illersuisut Peqatigiiffianni siulersuisuunernut ilaasortaq, Tom Ostermann taama oqarpoq.

Pinerluttunik Isumaginnittoqarfimmut Finn Meinelip maalaarutaa suli akineqarsimanngilaq.

Radioaviisimit pisoq malinnaavigissavarput, Pinertunik Isumaginnittoqarfiup pisortaa, Thomas Nicolajsen aqagu oqaaseqarniarluni nalubnaareerpoq.