Illersuisoq: Pakatsivugut
42-nik ukiulik pinerlussimasut iniissiisarfianniittussanngorlugu ukioq ataaseq qaammatillu qulit eqqartuunneqarpoq, 37-nillu ukiulik qaammatit qulit pinerlussimasut inissiisarfianniittussanngorpoq. Blok 14-imi toqutsineq pillugu Nunatta eqqartuussivia ullumi taama aalajangiivoq. Pineqartuni marluusuni Nuup eqqartuussivianniit eqqartuussinermi aalajangiinerit sukannernerulersinneqarput, Nunattalu eqqartuussiviata aalajangiinera 37-nik ukiullip illersuisuata pakatsinarnerarpaa.
- Pineqaatissiineq tusaatissatut tiguarput. 37-mulli ukiulimmut atatillugu eqqartuussisut isumaqatigiinngissuteqarnerat maluginiarparput, 37-nik ukiullip pinngitsuutinneqarnissaa eqqartuussisup ataatsip piumasarisimammagu, eqqartuussisuserisoq Jens Paulsen oqarpoq.
Seqqorneq imminut illersorniarnermik tunngaveqartoq illersuisutut oqaatigigaluarpat, pineqaatissinneqartullu iperagaanissaat piumasaragalugu, Nunattali Eqqartuussiveqarfiata tamanna itigartippaa. Tamanna pillugu qanoq isumaqarpit?
- Tamanna tusaatissatut aamma tiguarput. Unnerluussisummi saqqummiussaat tunngavigalugit eqqartuussisut aalajangiipput, unnerluunneqartorlu pineqaatissinneqarnissaanut takussutissaqarnerarlugu eqqartuuppaat. Taama aalajangiisoqarnera isumaqatiginngilara, allatulli ajornaqaaq Jens Paulsen oqarpoq.
37-nik ukiulik Nuup eqqartuussiviani pinngitsuutinneqaraluarpoq, Nunattalu eqqartuussiviata pisooqataasutut eqqartuuppaa, 42-nik ukiulik aallaammik ikkussuiniarneranik ikiorsimammammagu, seqqorniarneranillu unitsitsiniaasimanngimmat.
Eqqartuussinerup inernera unnerluussisussaatitaasut naammagisimaarpaat, unnerluussisussaatitaasut sinnerlugit najuuttoq Anne Sofie Lohse ima oqarpoq:
- Nuup Eqqartuussiviata aalajangiussaa inatsisitigut eqqunngitsuusoq isumaqarpugut, taamaammat Kalaallit Nunaanni Politiit suliaq suliareqqitassanngorteqqippaat. Eqaartuussinerulli Nunatta eqqartuussiviata ullumi oqaatigisaata takutippaa, nunatta eqqartuussiviata suliassamik naliliisimanerput isumaqatigigaa. Pingaartumik toqumik kinguneqartumik nakuusersimaneq pineqartoq aammalu taakkua marluullutik peqatigiillutik taamaaliorsimasut, kiisalu tamatumani imminut illersorneq pineqanngitsoq. Taamaalilluta ullumi eqqartuussineq assut iluarisimaarparput Anne Sofie Lohse oqarpoq.
Eqqartuussisuunerulli pineqaatissiinermut piumasaqaataasunit annikilliliinerunissamut tunngavigisimavaat, inuit taakkua marluk aallaasersornerup nalaani annilaangasimanerat aalassassimaartutullu pissuseqarnerat. 42-nik ukiullip illersuisua ullumi oqaaseqartinniaraluarparput, iluatsissimanaguli.
