Illersuisoq: Namminersornerullutik Oqartussat susoqarnera nalunngilaat
- Eqqartuussivimmut sassartinneqartut tamarmik pinngitsuutinneqarnissamik erseqqilluinnartumik kissaateqarput. Aammami taama inerneqassasoq naatsorsuutigilluinnarpaat, Nicholas Symes, eqqartuussassanngortinneqartut ilaasa sisamat illersuisuat oqarpoq. Taassuma aamma Sulisa A/S-imut attuumassuteqarsimasut eqqartuussivimmut suliassanngortinneqartut tamaasa suliap ilarujussuani illersussavai.
Puisi A/S-ip tunisassiassaqannginnini tuniniagassaqannginninilu pissutigalugu akiliisinnaajunnaarneranut millionilikkaat annaaneqarmata, unnerluuneqartut
Namminersorlutik Oqartussanit akisussaatinniarneqarput.
Namminersorlutik Oqartussat piumasaqaatai, Nunatta Eqqartuussivianiinnerup ulluisa siullianni 22 millioni koruuninngorsimapput, siulersuisuni ilaasortaasarsimasunut katillugit qulingiluanut, Puisip pisortarisimasaanut, kukkunersiuisiuinut eqqartuussissuserisuanullu akileqqullugit piumasaaqaatit.
22 millioni koruunit taakkua sulianut immikkoortunut marlunnut - taamalillunilu aamma akiliinissamut piumasaqaatinut avinneqarput. Siullermi Namminersorlutik Oqartussat nammineq piumasaqarlutik aappaanilu Namminersorlutik Oqartussat Puisi A/S-ip akiliisinnaajunnaarnerani suliaqartut sinnerlugit piumasaqartuullutik.
Namminersorlutimmi Oqartussat isumaqarput, Puisi A/S ingerlaqqissinnaajunnaariartortoq siulersuisuisa takusinnaasimasariaqaraluaraat, suliniullu ingerlaannaq unitsillugu.
Kisianni siulersuisut paarlattuanik 12 millioni koruuninik atorniarnissaminnut taamanikkut Namminersornerullutik Oqartussanut qularnaveeqqusisooqqullugit qinnuigaat. Taamaaliorput, Namminersorlutik Oqartussat isumaat malillugu erseqqissanngivillugu, navialisoornissaq qanoq qanitsigisoq.
Kisianni taama piumasaqarneq - illersuisup oqarneratut Namminersorlutik Oqartussat puiguinnarsinnaavaat. Nicholas Symesimi isumaqarpoq, Namminersornerullutik Oqartussat sunerlutik nalunngilluinnarsimagaat.
- Una navialisoorfiusinnaaqisoq, Namminersornerullitik Oqartussat taamani ilisimavaat. Aamma nalunngilaat, suliniut una aningaasanik annaasaqarfiusussaasoq. Taava suliniummi siulersunngortitat kingornatigut taarseeqqusineq naapertuutinngilluinnarpoq, Nicolas Symes oqarpoq.
Namminersorlutik Oqartussat eqqartuussissuserisuat Radioavisimut oqaaseqarnissamut kissaateqanngilaq.
Nunatta Eqqartuussiviani suliassaq ullumi aallarnisarneqarmat unnerluutigineqartoq ataaserluunniit najuutinngilaq, kisianni eqqartuussivimmi suliap ingerlanerani tamarmik apersorneqassapput. Kisianni Puisi A/S-imik isumassarsisuusoq peqataassanngilaq, Namminersorlutik Oqartussat sumiiffissisimangimmassut.
Suliaq tamaat qulaajarniarlugu Nunatta Eqqqartuussiviata qaammat ataaseq immikkoortissimavaa, aamma eqqartuussivik qanorluunniit aalajangiigaluarpat, Namminersorlutik Oqartussat suliassanngortinneqartulluunniit periarfissaqarput, suliaq Danmarkimi Østre Landsretimut ingerlateqqissallugu.
