ASSIT Illersornissaqarfiup Nuummi paasititsiniaanera inuusuttuaqqanit soqutigineqarluarpoq

Qallunaat sakkutooqarfianni sakkutuujunermi suut piumasaqaataanersut pillugit paasititsiniaanermi inuusuttuaqqat peqataasut, timikkut pisinnaasaasa qanoq pitsaassusaat misiligarneqarput, peqataasunit tamaviaannarluinnarluni.

Taakku ilagaat nuummiu Katrine Egede 15-inik ukiulik. Taanna arpalluni qanoq qasujaatsigineranik misilitsittoq malillugu aperaara, sooq sakkutuut paasititsiniaanerannut peqataanersoq, Katrine Egedelu siullermik ima akivoq.

- Siunissami misilikkusuppara sakkutuunngorniarnissara.

- Sakkutuunngornissarnut qinnuteqarlutik akuerisaaguit tamanna Danmarkimi ingerlanneqartussaavoq, tamanna qanoq isumaqarfigaajuk?

- Tamanna ajunngilaq, neriuppunga qinnuteqaruma akuerisaassallunga.

Katrine Egede aamma oqarpoq meeraallunili sakkutuunngornissani pilerigalugu misilikkusuttarsimallugu.

 Paasititsiniaanermi Illersornissaqarfik aamma pissarsiaqarpoq

Inuusuttuaqqalli kalaallit kisimik paasitsiniaanermi pissarsiaqanngillat. Qallunaat Illersornissaq pillugu Sakkutooqarfiannit qangali aamma eqqartorneqartarpoq, kalaallinik inuusuttuaqqanik sakkutuunngorusussinnaasunik pilerilersitsinissaq.

Qallunaallu Nunatsinni sakkutuut imarsiortut kalaallinik inuusuttuaqqanik atorfissaqartitsisut, Imarsiortut Sakkutuut kaptajnløjnantiat, Morten Runeberg oqarpoq.

- Sakkutuut Kalaallit amerlanerit Kalaallit Nunaanni atorfissaqartinneqarput tassami taakkuupput nunaminnik immikkut ilisimasallit, tassa uangutsinnut qallunaanut naleqqiullutik, pinngortitarsuup qanoq inneranik ilisimasaqarluarput uagut aamma ilinniarfigisinnaasatsinnik.

Kalaallit inuusuttuaqqat nukittupput

Imarsiortut Sakkutuut kaptajnløjnantiat, Morten Runeberg oqarpoq. Taanna inuusuttuaqqat kalaallit timikkut pisinnaasaannik misilitsinnermut nakkutiginnittuuvoq.

- Kalaallit timikkut pisinnaasaat ajunngilluinnarput. Piumaffigineqartillutik nukitik tamaasa atorlugit tamanna naammassiniartarpaat. Takusinnaavaralu tamanna nuannaralugu pigaat, Morten Runeberg oqarpoq.

Paasititsiniaaneq Naalakkersuisunit nuannaarutigineqarpoq

Sakkutuut paasititsiniaaneranni najuuttut ilagaat, Ilinniartitaanermut Naalakkersuisoq, Nivi Olsen aamma Nunanut allanut tunngasunut Naalakkersuisoq, Vittus Qujaukitsoq.

Ilinniartitaanermut Naalakkersuisup, Nivi Olsenip inuusuttuaqqat sakkutuutut ilinniagaqalersinnaaneri taamatullu Nunatsinnut iluaqusiisinnaaneri takorloorluarsinnaanerarpaa. Taanna nangilluni ima oqarpoq.

- Inuusuttuaqqat piumasaqaatitalimmik inooriaatsimik paasinninnerunissaat kissaatima annerpaartaraat. Qilanaaraaralu inuusuttuaqqanut tamassuma siammaannissaa, taamaalilluni piumasaqaatinik suugaluartunilluunniit naammassinnissinnaaneq anguneqartussaammat, Nivi Olsen taama oqarpoq.

Nunanut allanut tunngasunut Naalakkersuisup, Vittus Qujaukitsup oqaatigaa, kalaallit inuusuttuaqqat siunissami sakkutuutut sulilernissaat takorloorneqarluarsinnaasoq. Taannalu nangilluni ima oqarpoq.

- Issittumi Sakkutooqarfiup qullersaqarfia Nuummut nuunneqarnikuuvoq. Tassanilu suliassat imarsiortuuppata, silaannakkoortuuppata nunamiluunniit sakkutuujuppata tamanna apeqqutaatinnagu sakkutooqarfimmit piumasaqaataasut, tassa Nunatsinni innuttaasut akuunerulersinneqarnissaat Naalakkersuisunit ilassilluarparput, Nunanut allanut tunngasunut Naalakkersuisoq, Vittus Qujaukitsoq taama oqarpoq.

Kalaallit inuusuttuaqqat timikkut pisinnaasaasa misilinneqarnerisa saniatigut danskisut tuluttullu oqaluttariarsornerit aamma misilinneqarput, tassani pingaartinneqarnerullutik allattariarsornermi qanoq pinginnaaneqartiginersut.