Assi: Forsvaret

Illersornissaqarfik nunatsinneersunit piumasoq

Nunatsinni inuusuttut Danmarkiliaqqaanngikkaluarlutik sakkutuujusussaanermut misilitsissinnaanngorput.

Nunatsinni misilitsissinnaaneq siullerpaaq Nuummi novembarip 19-ianit 21-ata tungaanut pissalluni.

- Neriuppunga kalaallit inuusuttaat sakkutuujusussaanermut soqutiginnikkumaartut, amerliartorumaartullu.

Umiarsuup naalagaa, nunatsinni Illersornissaqarfimmi akisussaasoq, Dennis Rasmussen oqarpoq. Taassuma ilanngullugu oqaatigaa neriulluni nunatsinni inuusuttut suli amerlanerusut sakkutuujusussaanermik pisinnaatitaanermut ilisimasaqarnerulissasut.

- Kalaallit Nunaanni peroriartorsimagaanni illersuisoqarfiup atorfeqarfittut periarfissaanera takujuminaassinnaavoq. Sakkutuujusussaatitaanerup misigisaqarluarfiusinnaanera ataatsimoorfiuneralu takorlooruminaassinnaavoq. Ilinniakkamik suliffissanilluunniit periarfissaanera piginnaasanillu allami atorsinnaasanik ineriartorfiusinnaanera takorlooruminaassinnaalluni.

AAMMA ATUARUK Sakkutooqarfinni kalaallinik inuttaqalernissaq oqallisaavoq

Inuusuttut sakkutuut sorsuffimmukartinneqarunnannginnerat Dennis Rasmussenip oqaatigaa.

- Sakkutuujusussaatitaanerup naammassiniarnerani tunngaviusumik ilinniagaq naammassiniagassaasarpoq, tamannalu Danmarkimi pisarpoq. Tassalu Danmarki sorsutsinnagu sakkutuujusussaatitaanerminnik naammassinninniartut sorsugiarunnaratik.

Piukkunnaateqarneraanni illersornissaqarfimmi  immikkoortut pingasut, tassalu sakkutuut nunasiortut, imarsiortutut, timmisartortartutut upalungaarsimasutulluunniit sakkutuujuffiginissai ullormi siullermi qinerneqarsinnaapput.

Kikkulluunniit 18-ileereernikut piumagunik Dronning Ingridip napparsimmavissuani misissortissinnaapput. Tassani silassorissusermik, nakorsamik misissortinnermik siunnersortinnermilu novembarip 19-ianit 21-at ilanngullugu nalunaaqutaq quliniit misissortikkiartortoqarsinnaasassalluni.

AAMMA ATUARUK Isumaqatigiissut nunatsinnut pisussaaffiliisoq Hammond isumaqarpoq

Dennis Rasmussenip neriuutigaa suleqatini peqatigalugit Nuummiinnerminni inuusuttorpassuit takkukkumaartut.

- Siunnersuutigerusupparput soqutiginnikkaanni takkulluni oqaloqatiginnikkiartornissaq, taamaalilluta neqeroorutigisagut ersarinnerusumik nassuiaatigisinnaagatsigit.

Taassuma ilanngullugu eqqaasitsissutigaa misissortikkiartorunik inuttut uppernarsaammik nassataqarnissaat.

Misilitsinnissaq Illersornissaq pillugu isumaqatigiissummut, januaarimi 2018-imi atuutilertumi ilaasoq, Nuummi ingerlanneqassaaq. Nuummi, Qaqortumi, Aasianni, Sisimiunilu ilinniarnertuunngorniarfinni ukiup tullianit ilinniartut sakkutuujusussaanermik misilinneqarnissamut neqeroorfigineqartarnissaat Illersornissaqarfiup siunertaaraa.

AAMMA ATUARUK Politiit qarasaasiakkullu isumannaallisaaneq illersornissaq pillugu isumaqatigiissummi nukittorsarneqartut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat