Illersornissaq suleqatigiissutigilerpaat
Danmarki Island-ilu siunissami imminnut qanimut tikillutik isumannaallisaanissamut illersornissamullu tunngatillugu suleqatigiilissapput. Tamanna paasinar-sivoq Folketing-ip Nunanut Allanut Politikikkut Ataatsimiititaliaata sinaakkusiussatut isumaqatigiissut akuerimmagu, nunanut allanut ministerimit, Per Stig Møller-imit Island-imiut oqartussaannit tamanna Norgep illoqarfiisa pingaarnersaani; Oslo-mi ataatsimeeqatigiinnermi atsiorneqarpoq.
Taamatut isumaqatigiissusiortoqarneranut pissutaavoq 2006-imi septemberi qaammat amerikamiut Keflavik-mi sakkutooqarfitsik qimammassuk.
Tamatuma kingorna Island-imut isumannaallisaanikkut politikeqarnerat sakkutooqarnikkut illersornissakkullu uninngaannaleraluarsimavoq.
Suleqatigiilernissamik isumaqatigiissutip imaa ilaatigut tassaavoq; ataatsimoorussamik sakkutuunik sungiusaa-qatigiittarnissat, upalungaarsimanissamullu nukittorsa-qatigiinnissaq kiisalu tikeraaqattaarunnissat sungiusaqatigiinnissallu qallunaat island-imiullu timmisartuinik, helikopteriinik, umiarsuarnillu sorsuutinik aammalu umiarsuarnik alapernaarsuutinik ataatsimut ikioqatigiilluni taamaalilluni suleqatigiittoqalissalluni.
Danmark-i Island-ilu ukiorpaalunngortuni imaatigut annaassiniartarnermi, aalisariutinillu nakkutilliinermi imaanilu avatangiisinut tunngatillugu nakkutillinerit suleqatigiiffigisarpaat.
Isumaqatigiissut nutaaq imaalerpoq, qallunaat alapernaarsuutaat umiarsuit maannamiit Reykjavik-ip umiarsualivianut talikkiartortalersinnaanngornerat ammaanneqarpoq, Island-imiullu imaatigut alapernaarsuutaat sungiusaqatigisalertussaallugit, soorlutaaq imaatigut annaassiniarnerit aamma suleqatigiissutigisalertussagaat.
