Illersornissaqarfik Issittumerup atlantikullu avannaanerup pitsanngorsarnissaanut 1,5 milliardit koruuninngappoq.Assi: Scanpix

Illersornissaq pillugu isumaqatigiissut nutaaq: Nunarput nammineq illersornissamik ilinniarfeqalissasoq

Kalaallit inuusuttut nunatsinni sakkutuujusussaatitaanermik ilinniarsinnaanngussapput. Tamatuma saniatigut nunatsinni nunami imaanilu nakkutilliineq annertusineqassaaq.

- Sakkutuujunermut assingusumik illersornissamik ilinniarneq Naalakkersuisut suleqatigalugit pilersinneqassaaq, tamanna kalaallit inuiaqatigiit nunatsinnik illersuinissamut peqataanissaannut periarfissaqartitsissaaq.

Isumaqatigiissummi "Arktis Kapacitetspakke"-mi Folketingimi amerlanerussuteqartut suliaanni taama allassimavoq.

Ilinniagaq Naalakkersuisut suleqatigalugit piareersarneqassaaq, taannalu Kangerlussuarmiissalluni. Siunertamut tassaunga 2023-mut 50 millionit koruunit immikkoortinneqarput, kalaallillu sakkutuut nunatsinni annaassiniarnermi nakkutilliinermilu sulianut upalungaarsimanermi ikiuutaassapput.

Tamatuma saniatigut Illersornissaqarfiup kalaallit 'ilisimatusarfiinik' suleqatiginninnera pitsanngorsarneqassasoq, isumaqatigiissummi allassimavoq.

1,5 milliardit koruuninik Issittumi nakkutilliinerunissamut aningaasaliineq
 

Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.


Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput. Aningaasat taakkua qanoq agguarneqassanersut isumaqatiginninniutigileruttorpaat.


Danskit naalakkersuisui Socialdemokratit, Venstre, Konservative, Liberal Alliance Radikale Venstrelu illersornissaq pillugu 2018-imi isumaqatigiissusiortut isumaqatiginninnialeruttortuupput.

Folketingimi ilaasortat nunanit avannarlerneersut isumaqatiginninniaqataanngillat. Isumaqatiginninniarnerilli Naalakkersuisullu ataqatigiissarneqartut, danskit sillimaniarnermut ministereqarfiat ilisimatitsivoq.

Nakkutilliineq nunatsinni suliffissaqartitsissasoq

Isumaqatigiissummi missingersuutit 2023-mut 1,5 milliardit koruuniusut affaat - 750 millionit koruunit - nunatsinni nunami nakkutilliinermut atorneqartussanik tassa timmisartuaqqanik inuttaqanngitsunik marlunnik pisinissamut ingerlatsinissamullu atorneqassapput.

AAMMA ATUARUK Kalaallit Nunaanni nakkutilliinermut isumaqatigiissut piareertoq

Timmisartuaqqat inuttaqanngitsut assigiinngitsut misissorneqaqqaartussaanerat pissutigalugu suli pisiarineqanngillat.

Nakkutilliisoqarnerulernera illersornissamillu ilinniarfik nutaaq nunatsinni suliffissanik pilersitsiffiussasoq, Trine Bramsenip (S) erseqqissaatigaa.

- Sulisoqarnerulissaaq suliffissaqarnerulissallunilu, illersornissamut ministeri oqarpoq.

Taassumali atorfiit qasserpiaat pineqarnersoq kisitsisinngorlugit oqaatigisinnaanngilai.

Savalimmiuni radari - sakkuunngitsulli

Savalimmiuni silaannakkut aarlerinaarinissamut radari isumaqatigiissummi aningaasartuutit annerit ilagaat, tassunga 390 millionit koruunit immikkoortinneqarput.

Radari Savalimmiuni oqartussaasunit akuerineqassaguni, raadarip silaannakkut Tuluit Nunaata, Islandip Savalimmiullu akornanni angallannermi NATO-p ullumikkut nakkutigisinnaanngisaanut 'isumannaatsuuniarnikkut amigaatinut' matussutaassaaq. 

Illersornissamulli isumaqatigiissut nutaaq nunatta Savalimmiunilluunniit akornanni sakkutooqarnikkut aaqqiagiinngittoqalissagaluarpat illersuinissamut atorneqartussanik amerlanerusunik sakkussanik nutaanik imaqanngilaq.

AAMMA ATUARUK Kalaallit Nunaanni nakkutilliinermut isumaqatigiissut piareertoq

Trine Bramsenilli oqarnera naapertorlugu nunatta Savalimmiullu eqqaani susoqarnera tunngavigineqarpoq.

- Sumiiffimmi timmisunik imaatigullu angalasunik nakkutiginninnissatsinnut Savalimmiuni atortunik nutaanik peqalernissaa pisariaqarpoq.

 

Assi: Illersornissamut ministereqarfik. Assip Issittumi nakkutilliinissamut suliniut nutaat takutippai.

 

Taassumali sakkunut nakkutiginninnerulernissamullu aningaasanik amerlanerusunik siunissami immikkoortitsisoqarsinnaanera itigartinngilaa.

Nutaanilli isumaqatigiissuteqarnikkut Issittumi matumani USA NATO-milu nunat allat peqatigalugit sungiusartoqarnerulissaaq.

Isumaqatigiissut Naalakkersuisut Savalimmiunilu Landsstyret ataqatigiissaareqatiginerisigut isumaqatigiissutigineqarpoq. Isumaqatigiissulli 'savalimmiormiut kalaallillu oqartussaasuisa' isumaqatigiissutip imarisaanik akuersineratigut aatsaat atuutilissasoq, isumaqatigiissummi allassimavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat