Trine Bramsen nunatsinnut pisortatigoortumik tikeraarngaalerpoq.Assi: Forsvarsministeriet

Illersornissamut ministeri tikeraartoq: Allaffimmik nutaamik ammaassasoq sillimaniarnermullu politikki oqaluuserissallugu

Tikeraarnissaq qilanaarisimavara. Suleqatigiinnermi siornanit pingaarnerulerpoq, Trine Bramsen oqarpoq.

Sillimaniarnermut politikki allaffimmillu nutaamik ammaanissaq, illersornissamut ministerip, Trine Bramsenip (S) Kangerlussuarmut aqagu tikikkuni suliassaaniipput.

Pissaanilissuimmi tassa USA, Kina Ruslandilu Issittumut sunniuteqarnerminnik annertusaapput, tamannalu nunatta sammineqarneruneranik kinguneqarpoq.

Taamaammat unammillernartut pillugit kalaallit suleqatini qanimut oqaloqatiginissaat pingaaruteqartoq, illersornissamut ministeri isumaqarpoq.

Illersornissamut ministerip attaveqatigiinnermut naalakkersuisoq, Karl Frederik Danielsen (Siumut) nunanullu allanut tunngasunut naalakkersuisoq, Steen Lynge (D) ataatsimeeqatigissavai.

- Tikeraarnissaq qilanaarisimavara. Suleqatigiinnermi siornanit pingaarnerulerpoq. Sillimaniarnermi politikkikkut pingaaruteqartunik unammilligaqarpugut, Trine Bramsen KNR-imut oqarpoq.

AAMMA ATUARUK Forsvarsminister Trine Bramsen besøger Grønland i morgen

Ministeri nunatsinnut pisortatigoortumik tikeraarngaalerpoq.

Trine Bramsenip Namminersorlutik Oqartussat oqaloqatigisarnerat ajunngitsuusoq erseqqissaatigaa. Illersornissamut tunngatillugu unammillernartoqarfiusuni avatangiisit nunallu tikeraarnissaa pingaaruteqartoq aaqqiissutaasussanillu nassaartoqassasoq taanna isumaqarpoq. Tamannalu kalaallit politikeriisa qanimut suleqatiginerisigut ingerlanneqassaaq.

- Kalaallit Nunaat qulangerlugu danskit naalakkersuisui illersornissaqarfillu aaqqiissutissanik ikkussuinissaat kissaatiginngilara. Kalaallit Nunaat aamma peqataassaaq.

- Sumiiffiit oqaluuserisavut takuniarniarpakka, kalaallillu piumasaat aamma oqaluuserissavagut, illersornissamut ministeri oqarpoq.

Allaffimmik nutaamik ammaaneq

Illersornissaqarfik InterForcemi allaffiata nutaap ammarnissaanut aamma piffissaliisoqarpoq.

InterForce tassaavoq illersornissaqarfiup, namminersortut pisortallu susassaqarfiisa akornanni suleqatigiinneq. Allaffik kalaallit nammineq kajumissutsiminnik upalungaarsimasoqalernissaanut suliaqartussaavoq, kalaallillu Issittumut soqutiginnittoqarnerata annertunerani illersornissamimmi upalungaarsimanermilu piffissap ingerlanerani ilaajartuaalernissaat anguniagaavoq.

Inuit aarlerinartoqaratarnissaanut ikiortissamilluunniit pisariaqartitsisoqarnissaanut illersornissaqarfimmi upalungaarsimanermi avataanni nalinginnaasumik suliffeqarnissaat siunertaavoq.

- Isumaqarpunga InterForcep Kalaallit Nunaanni allaffeqarnissaanut tamanna sutigut tamatigut isumassaqarluinnartoq. Kalaallit Nunaanni najugaqarluni inuuneqarnermi misilittagarilikkat danskit illersornissaqarfianut pingaaruteqarluinnarput, Trine Bramsen oqarpoq.

Trine Bramsenip sillimaniarnermut politikkimik oqallisiginninnermi InterForcep allaffissaanik allaanermi saniatigut illersornissamut ministerip Issittumi Sakkutooqarfik, sakkutuujusimasut caféat umiarsuarlu alapernaarsuut, Ejnar Mikkelsen aamma pulaassavai.

Trine Bramsen angerlarluni tallimanngornermi ullaakkut aallaqqissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat