Illersornissamut ministeri: Tassaassaaq Narsarsuaq, Kangilinnguit imaluunniit Nuuk

Issittumi sakkutooqarfik Kangerlussuarmi inissisimassanngilaq, taama erseqqitsigisumik qallunaat illersornissamut naalakkersuisuat Gitte Lillelund Bech Radioaviisimut oqarpoq.

- Issittumi sakkutooqarfik sumut inissinneqassanersoq suli aalajangerneqanngilaq, sapaatip akunnerata uuma naanerani nalunaarusiaq tigusussaavara. Nalunaarusiarlu nalilersorluarneqareerpat kingorna paasinarsiumaarpoq Narsarsuarmi, Kangilinnguani Nuummiluunniit inissinneqassanersoq, Gitte Lillelund Bech oqarpoq.

Qanittukkut Wikileaksip isertukkani uppernarsaatini saqqummiussigaluarpoq, Issittumi Sakkutooqarfiup siunissami Nuummiissasoq, tamannali suli aalajangiiffigineqanngitsoq paasinarsivoq, eqqortorli unaavoq sakkutooqarfik Kangerlussuarmi inissinneqarnavianngitsoq.

Kommune Kujallermi Borgmesteriusumut Simon Simonsenimut, taamaasilluni piumasaata piviusunngortinnissaanut suli periarfissaqarpoq. Illuatungaanili Qeqqata Kommuniani Borgmesterip siunnersuutaa, sakkutooqarfiup kangerlussuarmut inissinneqarnissaanut piumasaqaataa qatangiinnartussanngorluni. Ullo'qeqqanut Radioaviisimut ima oqarpoq:

- Sisimiut Kangerlussuullu inissisimanera eqqarsaatigalugu tamanna piukkunnarnerpaavoq, tamaani Issittumi Sakkutooqarfeqarlernissaanut, tassami eqqarsaatigineqartariaqarmata tamaani aamma takornariaqarneq annertuupilussuarmik ingerlanneqarmat, Hermann Berthelsen oqarpoq.

Illersornissamut naalakkersuisoq sapaatip akunnerata naanerani nalunaarusiamik tigusisussaavoq, tassanilu suleqatigiisitaliat sakkutooqarfissap inissisimanissaanut pitsaaqutissanik ajoqutissanillu misissuinikuupput. Kingorna nalunaarusiaq illersornissamut naalakkersuisup Folketingimut saqqummiutissavaa. Taamaasioreerunilu sakkutooqarfik sumi inissisimassanersoq aalajangiunneqarumaarpoq.

- Uannut pingaaruteqartoq tassaavoq,  Illersornissamut suliassanut tunngasut, issittumi sakkutooqarfissap inissineqarnissaanut nalunaarusiap naammassineqarnissaa. Tassalu taakku suliassaraat sakkutooqarfiup sumiinnissaa, illoqarfiillu sorliit piukkunnarnerusut, tassalu Kangilinnguit, Narsarsuaq imaluunniit Nuuk, Illersornissamut ministeri, Gitte Lillelund Bech oqarpoq.

Illersornissaq pillugu folketingimit isumaqatigiissutissaq 2014-p tungaanut atuuttussatut siunnersuutaavoq.