Illersornissamut ministeri Nuummiippoq

Tullianik pisortatigoortumik Tartupaluliartoqassappat, Kalaallit Nunaannit ilaasoqassasoq aamma danskit kalaallillu erfalasui Tartupalummi amuneqassasut, Nuummi ulluni makkunani tikeraartup danskit illersornissamut ministeriat Søren Gade oqarpoq.

Illersornissamut ministerip ulluni makkunani nunatsinniinnera Tartupalummut tunngassuteqanngikkaluartoq, tamanna pillugu ima oqarpoq:

Nalunngilara nunanut allanut ministereqarfiup Tartupaluk pillugu Kalaallilt Nunaanni Naalakkersuisut attaveqarfigisimagai, uanilu tikeraarninni Tartupaluliartussaanngilanga, Nunanullu allanut ministerip Per Stig Møllerip oqarneratut oqarusuppunga; tullianik Tartupaluliartoqassappat Kalaallit Nunaanniit peqataasoqassaaq erfalasullu kalaallit danskillu erfalasui amuneqassapput, taama oqarpoq Illersornissamut ministeri Søren Gade.

Taanna ippassaq Nuummut tikippoq, unnuarulu umiarsuarmut alapernaarsuummut ilaalluni Kalinngualiassaaq, tassanngaanniit Pituffiliassalluni. Danmarkimullu utinnginnermini Station Nord-i aammattaaq alakkarniarpaa.

Maanga tikeraarninnut siunertaavoq, maani sakkutooqarnerup qanoq innera alakkassagiga, Søren Gade oqarpoq.

Taassuma assut qilanaaraa Josef Motzfeldtip oqaloqatiginniniarsimanera. Naatsorsuutigaalu sakkutooqarfiit pillugit oqaloqatigiikkumaarnertik.

Søren Gade siornatigut nunatsinneereersimavoq umiarsuarmullu alapernaarsuummut Vædderimut ilaanissani qilanaarerpaloqaa, neriuutigaalu arfernik takusaqarumaarluni.