Illersornissamut ministeri: Nuuk Narsarsuarmit pingaartinnerunngilara

Kommune Kujalliup borgmesteria, narrujuummersimallunilu tupigusuppoq, nammineq oqarneratut paasigamiuk, Danmarkimi illersornissamut ministeri, Kommune Kujallermi borgmesterip nalusaanik, Narsarsuarmi pissutsinik sapaammi ullaap tungaagut takuniaasimanera paasereerlugulu.

- Borgmesterip naapikkusukkaanga nalunngilara, taamaattorli Kalaallit Nunaanniinnissara sivikitsuinnaammat, tamatuma piffisaqarfiginissaa ajornakusoorsimavoq, Gitte Lillelund Bech oqarpoq.

Illersornissamut ministerip Narsarsuup Issittumi sakkutooqarfissatut piukkunneqarneranut atatillugu, ataatsimeeqatigiinnikkut amerlanerusunik paasissutissinneqassagaluarluni nassuerutigaa. Erseqqissarluguli, sakkutooqarfiup sumiinnissaanik borgmesterinut isumaqatigiinniartussaannginnami, tamannali aalajangiiffigineqartussaammat, suleqatigiit sakkutooqarfiup qullersaqarfianit sulisinneqartut misissueqqissaareerpata.

Ministerip tikeraarneranut atatillugu Kommune Kujalleq ilisimasaqannginnerartoq, Kommuneqarfik Sermersuumit teknikkeqarfimmi pisortaq Thorkild Lauridsen Nuummi illoqarfimmi angallassisuuvoq.

"Tassa immikkoortitsineq", borgmesteri Simon Simonsen qanittukkut taama oqarpoq.

- Ministeeriaqarfiup kissaatigisai piviusunngortinniarlugit ikiuutiinnarpugut, Naalakkersuisut inissisimanerat illersorlugu Kuupik Kleist taama oqarpoq.

Kisianni illersornissamut ministeri aperigaani taanna allatut nassuiaatissaqarpoq.

- Tassaana Namminersorlutik Oqartussanit oqarfigineqarama, Nuummi suleqatigineqartussat sumiinnerinik takuniaaninni ikiorusullunga. Taamaalilluni Namminersorlutik Oqartussat aaqqissugaannik teknikkimut pisortaq angallassisuuvoq. Taamaattorli Nuummiinninni arlaannaannilluunniit ataatsimeeqateqanngilanga. Aamma teknikkimut pisortaq ataatsimeeqatiginngilara, taassumami bussit sumunnarnissaat taamaallaat nassuiartarpaa.

Taamaalilluni Gitte Lillelund Bechip aalajangiusimavaa, Nuuk Narsarsuarmit pingaarnerutinnginnamiuk, aamma Narsarsuaq Issittumi sakkutooqarfiup sumiinnissaata aalajangiiffigineqarnissaata tungaanut eqqarsaatigineqartunut ilaammat.

Illersornissamut qullersaqarfiup ataani suleqatigiissitap nalunaarusiaq naammasseqqammerpaa, tamatumani Narsarsuup, Nuup Kangilinnguillu sakkutooqarfimmik inissiivissatut pitsaaqutai ajoqutaalu misissoqqissaarneqarlutik.

Kisianni sooruna taakku pingasorpiaat misissoqqissaarneqartut - aamma sooq Kangerlussuaq Sisimiullu ilaatinneqanngillat?

- Inissiivissatut piukkunnartut Namminersorlutik Oqartussat suleqatigalugit toqqartorneqarput, aamma Illersornissamut qullersaqarfiup innersuussutai naapertorlugit toqqarneqarput.

Sakkutooqarfiit Savalimmiuniittup Nunatsinniittullu kattunneqarnissaat, illersornissaq pillugu isumaqatigiissummi kingullermi ilaavoq, taanna Folketingimi partiit tamangajammik Enhedslisten kisiat pinnagu isumaqatigiissutigaat.

Issittumi sakkutooqarfiup sumiinnissaa aasaanerani sulinngiffiup kingorna aalajangiiffigineqassaaq.