Illersornissamut isumaqatigiissut nutaaq, Issittoq pillugu isumaqatigiissut 2 sapaatip akunnerata siuliani saqqummiunneqarmalli oqallittoqangaatsiarpoq.

Illuatungilittut partiiata, naleqqap isumaqatigiissut nutaaq danskit naalakkersuisuisa nunatsinnilu naalakkersuisut akornanni isumaqatigiissutigineqartoq isornartorsiorpaa.

Inatsisartunut Folketingimullu ilaasortap, Aki-Matilda Høegh-Damip (Naleraq) Folketingimit maanna sulinngiffeqartup isumaqatigiissut Nuummut “sakkutooqarnikkut qitiuffeqartitsilertussatut” isornartorsiorpaa. Tamatuma saniatigut taassuma oqarnera naapertorlugu Inatsisartut isumaqatigiissummut nutaamut ilaatinneqarsimannginnerarlugit isornartorsiuivoq.

Danskit illersornissamut ministeriata, Troels Lund Poulsenip (V) oqarnera naapertorlugu isumaqatigiissummi naalakkersuisut qanimut suleqatigineqarput. Taanna isornartorsiuinermut atatillugu allappoq.

- Issittoq Atlantikup avannaalu pillugu isumaqatigiissutip immikkoortuisa siulliup aappaatalu suliarineranni kalaallit naalakkersuisui naligiimmik, tatigeqatigiinnermik kinguneqarluartussamillu isumaliutiginninnermi suleqatigineqarput, Troels Lund Poulsen allakkatigut akissuteqarpoq, nangillunilu:

- Kalaallit naalakkersuisup suleqatima, Vivian Motzfeldtip tusagassiortunut oqaaseqarneratulli kalaallit naalakkersuisui isumaqatiginninniarnermi qanimut suleqatigineqarput, isumaqatigiissutillu suliarinerani sunniuteqangaatsiarlutik. Tamanna uppernarsarsinnaavara. Kiisalu isumaqatigiissutip immikkoortuini marlunni inernerit kalaallit naalakkersuisuisa pitsaasunik nutaaliortumillu siunnersuuteqarnerannit sunniivigineqarput.

Ernumassutissaqanngitsoq

Isornartorsiuinerup illersornissamut isumaqatigiissut nutaaq pillugu annertuumik oqallittoqalersippaa.

Aki-Matilda Høegh-Damip Issittumi Sakkutooqarfimmut qullersaqarfimmik nutaamik pilersitsisoqarnissaa Nuullu umiarsualiviani Illersornissaqarfiup umiarsuinut talittarfimmik pilersitsisoqarnissaa isornartorsiorneruaa. Aki-Matilda Høegh-Damip oqarnera naapertorlugu tamanna illoqarfiit pingaarnersaannut sakkutooqarnikkut qitiuffeqalersitsissaaq.

Kommuneqarfik Sermersuumi borgmesterip, Avaaraq Olsenip (IA) sakkutuut umiarsuinut talittarfiliornissamut pilersaarutit aamma isornartorsiorpaa. Borgmesterip oqarnera naapertorlugu talittarfik nuummiunut ”sorsunnermik, sakkussialersornermik sakkutuulersornermillu” eqqaasitsissutaassaaq, taanna tusagassiuutinut nalunaarummi allappoq.

Nunanut allanut naalakkersuisup, Vivian Motzfeldtip Naleqqamit isornartorsiuineq marlunngormat akerlilerpaa. Motzfeldtip oqarnera naapertorlugu Nuummi sakkutooqarfik nutaaq pineqanngilaq, kisianni Issittumi Sakkutooqarfiup Nuummeereersup allaffimmut pitsaanerusumut nuunnissaa.

Tamatuma saniatigut Illersornissaqarfiup umiarsui umiarsualivimmi maanna akornutaasarnera pissutigalugit sakkutuunut umiarsualivimmik kissaateqartoqartoq, naalakkersuisup KNR-imit marlunngornermi apersorneqarnermini nassuiaatigaa.

- Isumaqanngilanga ernumanissaminut pissutissaqartoq. Massakkut suliarisagut ima qiviarneqartariaqarput, tassa piginnaasat massakkumut isumaqatigiinniarnermi naammassineqartut, piginnaasallu nunap pigisariaqagai qangali naammassineqareertussaagaluit massakkut naammassineqarput. Aamma ullumikkut Artisk Kommandop maani nunatsinni najuunnera ullumikkullu ingerlatsineq taamaareerpoq, Vivian Motzfeldt oqarpoq.