Illersornissamut ataatsimiititaliaq silap akimmisaartippaa
Siriusimi nakkutilliisut tikinneqanngillat. Timmisartungaatsiarput Kangerlussuarmilu akunnittarfimmiingaatsiarlutik. Taamaasillutik aamma paasingujaat sila maani naalagaasoq.
- Timmisartorsuarnut Herculesinut ilaasimanngitsunut oqaatigisinnaavara timmisartumut naliginnaasumut sanilliullugu nipiliornerullunilu sajuppilunnerujussuummat. Tassani nalunaaquttap akunneri pingasut issiavugut, Pituffimmilu sakkutooqarfimmut apuutilerluta aquttoq ilisimatitsivoq putserpallaartoq. Kaaviiaariarluta misikkaluarparput minnatali. Taamaammat nalunaaquttap akunneri pingasut aamma timmisartoqqippugut taamalu Kalaallit Nunaata avannaarsua tummarnagu, illersornissamut ataatsimiititaliami ilaasortaq Karsten Lauritzen oqaluttuarpoq.
Illersornissamut ataatsimiititaliami ilaasortat arlallit aatsaat nunatsinniipput. Nunatsinniittareersimasut pisoq piareersimaffigineruaat takornartulli akisunaarlugu.
- Misilittakkatigut ilikkarneqartarpoq assersuutigalugu Thule Air Base-mut angalanermi suut nassatarineqartussaanersut. Nalunartuaannarpormi ulloq taanna apuukkumaarnerluni imaluunniit ullut arlallit utaqqisariaqassanerluni. Illersornissamut ministeriuninni arlaleriarlunga Kalaallit Nunaanni sila pissutigalugu saperngusarsimavunga. Taamatullu pisoqaraangat atisat atukkat naammanneq ajorput. Ataatsimiititaliami ilaasortat nutaat tamanna ilikkagaqarfiginnguatsiarpaat. Kisianni pakatsissutigaara inuit pikkorissorsuit Siriusimi alapernaarsuisut tikinngitsooratsigit. Kisianni immaqa ulloq alla tikissinnaajumaarpagut, Gitte Lillelund Beck arlaleriarluni nunatsinniittareersoq oqarpoq.