Illarsaarisartoq Conan O'Brien nunatsinnukalersoq

Conan O’Brien amerikamit nunatsinnut sisamanngorpat tikissaaq. USA-p præsidentiata Donald Trumpip Kalaallit Nunaata pisiarinissaanut soqutiginnilluni uppernarsareeraalu quiasaarisartoq nunatsinnut tikeraarnialerpoq.
Taannalu Trumpip pisinialikkersaarneranut ima ilassuteqarpoq:
- Kalaallit Nunaat, aamma imaaliorsinnaavugut: Amerikamut ilanngunniariarussi peqqinnissaqarfitta aaqqissuussaaneranut ilanngutissaasi. Amerikap peqqinnissakkut aaqqissugaanera qanoq innersoq googlekkut paasiniarniaqinasiuk, Conan O’Brien quiasaarluni ataasinngormat aallakaatitsinermini oqarpoq.
Conan O’Brien unnukkut aallakaatitassiamini ”Late Night with Conan O’Brien”-imik atilimmit tusaamaneqarluarpoq, Emmy Awardsimilu aamma ilisarititsisuunikuulluni.
Aliikkusersuisartoq aamma allamik aallakaatitassiortarpoq, taanna “Conan without boarders”-imik ateqarpoq, kalaallisuunngorlugu “Conan killeqarfeqanngitsumik”. Aallakaatitassiami nunanut tamalaanut takornariarnera malinnaavigineqarluni. Taanna allaakaatitassiornerminut atatillugu Cubami, Koreami, Mexicomi Israelemilu angalareerpoq. Taassalu maanna nunatsinnukartussanngorpoq.