Illarniuttorsuupput
![](/sites/default/files/styles/image_934x467/public/article_images/stand_up630.jpg?itok=fJeZXN6z)
- Tassanngaannaq billetinik pisiniuttut tulleriiaaleriasaarput. Naatsorsuutigaarput unnugu billetit tamarmik nungukkumaartut, Katuap saaffiginnittarfia KNR-imut taama nalunaarpoq.
Torrutiinnarlugu aliikkusersuinerit siullersarimmassuk illarnissamut ilimasuttorpassuaqarpoq isiginnaartullu Katuami inersuarmi Hans Lyngep inersuanik taaneqartartumi issiaviit 508-taapput.
Quiasaarisartut Hans Jukku Noahsen, John G. Sandgreen, Miké Fencker Thomasen aamma Jens-Jakob Lennert-Sandgreen annerusumik ilisaritittariaqarunanngillat tamarmillu ilisarnaatigaat quianartuugamik.
Unnugu sisamanngornerlu novembarip pingajuat aliikkusersuinissani suut qulequtarineqassanersut nipaarsaarutikannerallarpaat
- Kisianni tassaasinnaapput usuup puui, politik aamma timmisartortarneq, aaqqissuisuniit Jens-Jakob Lennert-Sandgreen KNR-imut oqarpoq.
- Quiasaarutissalli sorlerpiaasanersut aatsaat inissikkumaarparput aliikkusersuineq aallartilivippat uteqattaarisoqannginniassammat, Jens-Jakob Lennert-Sandgreen oqarpoq.
Aliikkusersuineq Tumit Productions-imit immiunneqassaaq pilersaarutaavorlu dvd-nngorlugu ukiortaap kingorna saqqummersinnissaa.
- Aamma misissorparput tv-kkut aallakaatinnneqarsinnaanersoq. Aatsaat nipaa ajoquteqanngippat, Jens-Jakob Lennert-Sandgreen quiasaarpoq.