Illarnissaq maanna tullinnguuppoq

Aliikkutassiaq ’Qungujugit’ unnugu tallimanngornermi Katuami takuteqaarneqassaaq  maannalu bilitsit isissutissat 313-it pisiarineqareerput. Aqagu arfininngornermi 'Qungujugit' takuteqqinneqassaaq.

Isiginnartitsisartut aliikkusersuillaqqissut NAIP-meeersut saniatigut isiginnaariat aamma akilinermiut isiginnaartitsisartui ArtCirq-imeersut takusinnaavaat. NAIP-imi isiginnaartitsisartut Igloolimeersullu ArtCirq ukiut marluk suleqatigiittareernikuupput.

NAIP-imiit isiginnaartitsisartut akunnerit marluk ingerlaneranni assigiinngitsorpassuarnik takutitaqartarumaarput, soorlu qilaatersornerit, inngernerit, erinarsornerit minnerunngitsumillu quisaaraluni isiginnaartitsinerit. Isiginnaartitsissutigisassaasa ilagaat siuaasatta Nuuk Centeri 'Antuukasik' takusimasuugunikku qanoq qisuariarsimassagaluarnersut.

Isiginnaartitsisartut ArtCirq Nuummi atuartut workshoppertippaat, tamanna saniatigut meeqqat NUIF-imeersut pingasut unnummut isiginnaartsitsinissamut peqataasussat aamma sungiusarpaat. Unnummut isiginnaartitseqataasussat ilagaat aqqanilinnik ukiulik Henrik:  

- Nuanneqaaq, aatsaat misililerpara peqataanissaq. Inuppassuit isiginnaartut isiginnaartitsilluni nuannerunaqaaq, NUIF-imiit aqqanilinnik ukiulik Henrik oqarpoq.

Isiginnaartitsisartut ArtCirq-imeersut Nuummi atuartunut NUIF-imeersulu pikkorissartitseqataasut ilagaat Daisy Irqqarqsaq:

- Nuummi meeqqat atuarfiini atuartut workshoppertinneri pikkorissartinnerilu pitsassuuvoq, sukkasoorujussuarmillu ilikkapallattarput maaniinnerlu nuannaraarput, taama isiginnaartitsinissamut sungiusarnerup nalaani Daisy Irqqarqsaq oqarpoq .

Katuami ‘Qungujugit’ isiginnaartitsissutigineqarnissaa Hans Lynge-p Inersuani nal.19.00 aallartissaaq.