Iliveqarfik uuliakoorfigitippoq
Uulia iliviup eqqaani inuinnaat uuliamut tankianneersoq, iliveqarfik aqqusaarlugu Deichmannip Aqquserngata Aqqusinersuullu tungaanut kuussimavoq.
Mingutsitsinerup qanoq annertutiginera qanorlu siaruarsimatiginersoq kommunimit suli ilisimavinneqanngilaq. Misissuinernili paasinarsivoq uuliakoorneq sumiiffiit ilaanni nunap iluanut 5 centimeterinik sitserussimasoq.
- Nuna mingutsinneqartoq piaartumik piiariarlugu allamik taarserneqassaaq, Qeqqata Kommuniani Teknikkimut Avatangiisinullu pisortaq, Mike Jakob Kristiansen oqarpoq, nangillunilu:
- Uulia sapaatit akunneri pingasut ingerlanerani tankimit koorujuulersimavoq. Aatsaat aput aammat uuliakoortoqarsimanera innuttasut ilaannit malugineqarpoq, Mike Jakob Kristiansen oqarpoq.
Mike Jakob Kristiansenip ilivermiittut qanigisaat ilerrit mingutsinneqarnikut salitsikkusukkunikkit kommunimi Teknikkimut Avatangiisinullu immikkoortortaqarfimmut saaffiginneqquai.
Palasip iliviutillit isumasioqatigeriarlugit ilerrit uuliakoorfigineqarsimasut salinneqarumaartut, kommunip nalunaarutigaa.