Iliuuseqartoq annaasaqartarpoq

Pilersuisup pisiassat 500.000 koruuninik nalilinnik igitsineranut inuit ileqimisaartornerat, suliffeqarfissuup paasisinnaavaa. - Soorunami uggornarpoq, kisianni allanut tunniussimagaluarutsigit uatsinnut suli akisunerussagaluarpoq. Pilersuisup pisortaa, Frederik Olsen oqarpoq.
Allattoq Jens Thorin
februaarip 18-at 2010 16:29

- Uggornarpoq, inuiaqatigiit taakkua pisiarerusussimanngimmatigit, Pilersuisup pisortaa oqarpoq.

Nunani allani pisiniarfissuit qinnutissatigut tuniniaanerat iluatsilluartoq, Pilersuisup 2007-mi unamillilerpaa. Kisianni Qaqortumi quersuarmi uninngasuutit 2009 naalermat suli amerlaqaat.

Qaqortumi ukiarmi akikillisoqalermat, illoqarfimmi pisiniarfiutillit akerlioqaat oqarlutik Pilersuisup, Namminersorlutik Oqartussat pigisaata, Qaqortoq pisiassanik ulikkaaraa, namminneq pisisussaarullutik.

Taava nunatta sinnerani pisiniarfiutiminnut nassiussuivoq. Tamannali aamma iluaqutaangaanngilaq, suli uninngasuutinik ulikkaaramik.

Kisianni immaqa pissaaleqisunut tunniunneqarsinnaasut?

- Tamakku soorunami eqqarsaatigaavut. Røde Korsi attaveqarfigaarput, taakkualu palletsit marluk tiguaat. Kisianni aningaasartuutit annertussammata, atisat iginnissaat Pilersuisumut akilersinnanerusimavoq, assersuutigalugu Haiti-mut nassiussimagaluarutsigit, aningaasartuutit akitsuutillu assigiingitsut akilertariaqalissagatsigit.

Inuit ileqimisaartussappata paasisinnaaviuk?

- Paasisinnaavara. Atisat tikisitagut amerlavalaarsimapput, taannalu soorunami ilinniarfigisariaqarparput, Frederik Olsen, oqarpoq.

Taanna aamma oqarpoq, katalogitigut ukiuni qaninnerni tuniniaaniaratik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq