Iliuuseqanngikkutta tupa 1 milliardit toqqutigiumaarpaat

Nunani tamalaani naalakkersuisut pujortartarnermut annertunerusumik iliuuseqajaanngippata pujortartarneq inuit milliardtit ukioq 2100- tinnagu toqqutigissavaat, Naalagaaffiit Peqatigiit peqqinnissakkut suleqatigiiffissuata WHO-p ilisimatuui oqarput.

- Tupamik atuisut affai tassa ukiumut inuit 5,4 millionit tupatornerup kingunerisaanik toqquteqartarput, WHO-p tupamut pinaveersaartitsinermik suliniuteqarfianeersoq Douglas Bettcher oqarpoq.

Nunarsuarmi tupatornerup kingunerisaanik toqquteqartut affaat nunani ineriartorfiusuneersuusarput, nunanilu taakkunani inuusuttuaqqat tupatulersartut amerliartupiloortut oqaatigineqarpoq.

Pissutsit taamaaginnassappata nunarsuarmi inuit tupatornerup kingunerisaanik toqquteqartut ukiut 20-t qaangiuppata ukiumut 8,3 millioninik amerlassuseqalersimassapput.

Naalagaaffiilli tupamut akiuiniarnertik annertusippassuk 8,3 millionit affaannaasa tupa toqqutigiumaaraat WHO-p ilisimatui siulittuipput.