Ilitsoqqussaralugu oqaatsivut illersortariaqarpagut

Ullumikkut ulloq tassaavoq UNESCO-p ilitsoqqussaralugu oqaatsinut ullorititaa. Ilitsoqqussaralugu oqaatsit nunarsuaq tamakkerlugu nalliuttorsiutigineqarput, nunatsinnili oqaatsit immikkut illuinnartumik pingaartinneqarput, aammalu immikkut inatsisiliuunneqarsimallutik. Inatsisartut nunarsuarmi nunat ikitsiuinnaat assingalugit oqaatsit pillugit inatsimmik aalajangersaasimapput.
februaarip 21-at 2013 12:45

Kulturikkut kingornussatta tigussaasut tigussaasuunngitsullu eriagalugit paarinissaannut ineriartortinnissaannullu oqaatsit sakkussaraagut pingaaruteqarnerpaasut. Ilitsoqqussaralugu oqaatsit illersornissaannik ineriartortinneqarnissaannillu suliniuteqarneq kulturikkut tamatigoortuunerup arlariinnillu oqaaseqarluni ilinniarnissamik nukittorsaaginnaratik, aamma nunarsuarmi tamarmi oqaatsitigut kulturikkullu ileqqorineqartunik paasinninnermik annertusaaqataapput aammalu paasinninneq, akaareqatigiinneq oqaloqatigiinnerlu tunngavigalugit ataqatigiilersitsisinnaallutik.

-Naak 160.000 - 170.000-it missaat Inuit oqaasiinik atuisuugaluartut, illersorneqarnissaat pingaaruteqarluinnarpoq. Nunarsuarmi sumi najugaqarneq apeqqutaatinnagu, nammineq ilitsoqqussaralugu oqaatsit oqaatsinik inuunerup ingerlanerani ilikkakkanit inummut pingaaruteqarnerpaajuaannarput. Taamaammat nammineq oqaatsivut pillugit ataatsimoortariaqarpugut, ullumikkullu ilitsoqqussaralugu oqaatsit ulluanni oqaatsivut nalliuttorsiutigalutigit, Inatsisartunut siulittaasoq Josef Tuusi Motzfeldt knr.gl-imut oqarpoql.

Piviusoq tassaavoq kalaallisut oqaatsivut mohavk, yupik, cheroket auillu assingalugit oqaasiummata polysyntetiskiusut, tamannalu pissutigalugu oqaatsivut oqaatsinit allanit allaanerussuteqarput avataaniillu tikittunit ilinniarnissaat ajornakusoornerulluni. Taamaammat aamma kalaallit oqaatsimik nunaminni pingaarnertut atorneqarnissaasa illersorneqarnissaannut tatineqarsimapput.

-Maani nunatsinni sumiorpaluutit pisortatigoortumik akuerisat pingasuupput, avannaamiusut, tunumisut kitaamiusullu, sumiiffinnilu taakkunani pingasuni sumiorpaluutitik pingaartinnerpaavaat ilitsoqqussarigamikkit. Taakku tammatsaaliorneqartariaqarput, tamassagaluarpatami oqaatsit assigiinngisitaarnerat aamma tammassaaq. Aammattaaq ussersuutit erseqqissaatigerusuppakka, taakkumi naalakkersuisut nunarsuarmi tamaneersut tamakkiisumik aamma tapersersortariaqarpaat. Oqaatsinut inatsisip naleqqussaqqinneqarnissaani oqaatsinik allanik ilinniarneq pillugu aalajangersakkap ataani ussersuutit oqaatsinut allanut naligiissinneqassannginnersut aamma isumaliutigineqartariaqarpoq, Josef Motzfeldt isumaqarpoq.

Ilitsoqqussaralugu oqaatsit ulluat ilaatigut Tasiilami, Qaqortumi Nuummilu nalliussiniarlugu aaqqissuussinerit ingerlanneqassapput.