Ilitsoqqussaralugu Oqaatsit Ulluat sapaatiuppat nalliussineqassaaq
Ualip ingerlanerani oqaatsit assigiinngitsut atorneqassapput, soorlu kalaallisut, inuktitut, franskisut, Norskisut, svenskisut, danskisut, tyskisut tunumiusullu saqqummiussisoqassalluni. Aammattaaq tunumiusut qilaatersortoqarlunilu isiginnaartitsisoqassaaq.
Aammattaaq UNESCO-p oqaatsit pillugit nalunaarusiaa saqqummiunneqassaaq. Oqaatsinik ilinniarneq kiisalu oqaatsinik nutserisarneq ukiormanna qulequtaritinneqarpoq, taakkuummata allatut oqaasilinnik oqaloqateqarsinnaanissamut tunngaviullutillu ammaassisuusartut.
Oqaatsinut Ullorititap sinerissami, soorlu meeqqerivinni, atuarfinni, suliffeqarfinni assigisaanilu oqaatsinik sammisaqartitsinikkut malunnartinneqarnissaa, Oqaasileriffimmit kaammattuutigineqarpoq.
- Sammisaqartitsineq pisortanit kisimi akisussaaffigineqartariaqanngilaq. Kikkut tamarmik akisussaaqataapput, Oqaasileriffik kaammattuivoq.
Ilitsoqqussaralugu Oqaatsit Ulluat nunatsinni 2004-mili nalliussineqartalerpoq.