Ilitsoqqussaralugu Oqaatsit Ulluat nalliuttorsiutigineqalerpoq

Nunat tamalaat akornanni Ilitsoqqussaralugu Oqaatsit Ulluat Oqaasileriffiup Katuami unnugu nalunaaqutaq arfineq-marluniit qulit tungaanut nalliuttorsiutigitinniarpaa.

Inuit oqaatsimikkut kulturikkullu assigiinngitsunik tunuliaquteqartut ilaatigut oqaatsitik atorlugit taallat erinarsuutillu saqqummiutissavaat. Pingaartumik aamma inuusuttut oqaatsinik atueriaasii isummeriaasiilu pillugit misissukkat inuusuttunit ilinniartunit saqqummiunneqassapput.

Kitaamiusut, avanersuarmiutut, inuktitut, islandimiusut, savalimmiormiutut, afrikamiusut allanillu ilitsoqqussaralugu oqaatsit atorlugit saqqummiisoqassaaq.

Ilitsoqqussaralugu Oqaatsit Ulluata siunertaraa oqaatsit kulturillu iluanni assigiinngiiaassuseq siuarsassallugu akaareqatigiinneq oqaloqatigiinnerlu aallaavigalugit. UNESCO-p (FN-ip ilinniartitaanermut, ilisimatusarnermut kultureqarnermullu kattuffia) ulloq taanna 1999-imi nunarsuaq tamakkerlugu ukioq tamaasa nalliuttorsiutigineqartusanngorlugu atuutsilerpaa.