Ilitsoqqussaralugu oqaatsit misilitsissutigineqassanngillat

Meeqqat atuarfiini ilinniaqqiffiusunilu atuartitsissutini oqaasilerinermik misilitsiffiunngitsuni ilitsoqqussaralugu oqaatsit atorlugit misilitsissinnaalernissamut siunnersuut Naalakkersuisunit ullumi itigarteqqinneqarpoq.

Itigartitsisunut ilaavoq Atassut.

- Nalunngilarput, nunatsinni nutserisoqarniarneq ajornartorsiutaasoq aamma sumiiffiit ilaat nutserisoqanngivissorput. Nutserisoqartariaqalissappat nutserisut piginnaasaat aamma apeqqutaalissapput, taamaattumik tulluussorinngilarput taama ittumik eqqussisoqarnissaa. Atassummeersoq Aqqalu Abelsen taama tunngavilersuivoq.

Siumumeersup Doris Jakobsenip Inatsisartunut siunnersuutaa aappassaaneerlugu ualimanna oqaluuserineqarmat Naalakkersuisunit itigartinneqarpoq, oqalutsinut aningaasartuutissat amerlavallaarnissaat tunngavilersuutigalugu. Atuartitsinermili atortussanik nutserisarneq pillugu Naalakkersuisut 2004-mi ukiakkut misissuisitsilernerannut ilanngullugu misissugassatut innersuunneqarpoq.

Doris Jakobsen isumaqarpoq, misilitsinnissamut annilaangaasarneq millisinneqarsinnaasoq, ilitsoqqussaralugu oqaatsit atorlugit misilitsissinnaasoqaleraluarpat, imalu nangippoq:

- Tatigivallaarnani oqaatsit allat atorlugit misilitsinneq kingunerisinnaavaa toqqissisimannginneq karakterinut apparsaataasinnaammat, ilitsoqqussaralugu misilitsissinnaalernissaq siunnersuutigaara. Doris Jakobsen taama oqarpoq.

Ilinniaqqiffiusuni assersuutigalugu Imarsiornermik Ilinniarfimmi atuartut soraarummeernerminni nutserisoqarsinnaatitaareerput, ilinniartut tamarmik taama periarfissaqalernissaat pisariaqannginnersoq Atassummit Aqqalu Abelsenimut apeqqutigaarput:

- Nutserisoqarnissamut periarfissalinni ajunngilaq ingerlaniarli, nutserisussaqanngitsunili illersorsinnaasumik ingerlatsinissamut pissaqartitsinngilavut. Aamma soorlu ilinniarnertuunngorniarfinni ilinniartut sinnerfigereertarpaat qaffasinnerusunik ilinniagaqarnissartik, ilinniaqqiffinni oqaatsinik allanik pisinnaasaqarnissaq piumasaqaataareerpoq. Siunissamili kalaallisut oqaasilinnik naammattunik ilinniartitsisoqalersimassagutta kalaallisut misilitsissinnaalernissaq aporfissaarutissaaq. Aqqalu Abelsen oqarpoq.

Misilitsittarnermut siunnersuut Inatsisartuni pingajussaaneerneqassanngilaq.