Ilitsersuisup meeqqat tulluusimaarutigai
Amerikami filmit nittarsaanneqarneranni Woodstock festivalimi assilisanik kusarnarnerpaatut filmi ''INUK'' toqqarneqarpoq. Filmi Uumannami immiunneqarpoq, filmimilu meeqqat Uummannarmiut aammalu Uummanamilu innutaasut inuttaritinneqarput.
Kalaallit Nunaanni ullumikkut inuuneq qangalu kulturi filmimi takutinniarneqarpoq:
Filmimi pingarnertut inuttaavoq Inuk Uummannami meeqqat angerlarsimaffianni najugaqartoq, Uummannamilu ulluinnarni inuuneq pillugu filimiaalluni.
- Isiginnaartitsiniaraanni imminut tatigisariaqarpoq. Suleqatima Jean-Michel Huctin-ip isiginnaartitsisut imminut tatigilertittartorujussuuai. Kalaallit isiginnaartitsigaangamik periarfissanik allaanerusunik ujarlertartut maluginiarpakka, taama oqarpoq Mike Magidson, filmi ''INUK''-mi ilitsersuisuusoq, nangillunilu:
- Filmimi inuttaasut ilitsersoraangakkit uanniilluunniit ajunnginnerusumik isiginnaartitsisarput, piumasaqaatikkalu qaangerlugit takutitsisarlutik filmiliornermilu suleqatikkumarsimapput, Mike Magidson oqarpoq.
Filmimi takkutinniarneqarpoq Kalaallit Nunaanni ullumikkut inuuneq aammalu qanga periaatsit ataatsimut naapikkaangata susoqartarnersoq.
Filmiliortullu meeqqat angerlarsimaffiani najugaqartut suleqatigineranni misigisaqartikkusussimaat. Filmimik sanaannanngillat, meeqqalli misigisassaanik nutaanik tunniusserusussimapput. Tunniussaannullu ilaavoq meeqqat kingumut qiviaraangamik tulluusimaarutigalugu filmiliarineqarnertik eqqaasassagaat.
- Filmimi oqariartuutaavoq nunap inuiini inunngortut, soorlu kalaallit taamaattut, taakku namminneq ajornartorsiumminnik namminneerlutik aniguisinnaasut. Ajornartorsiut anigorniaraanni aaqqiissutaasussaq kulturimiittarpoq. Inuiattut oqaluttuarisaaneq takuinnarlugu ajornartorsiutit aaqqinneqarsinnaasarnerat oqariartuutigaarput, Mike Magidson oqarpoq.
USA-mi naalagaaffimmi New Yorkimi filmit nittarsaanneqarneranni Woodstock Filmfestivalimi ''INUK'' takutinneqareermat isiginnaartut nikuuillutik ersaattaapput, filmilu pingaarnertut inuttaasoq Ole Jørgen Hammeken qaqitinneqarpoq nersualaarniarlugu.
- Filmip Kalaallit Nunaanni takutinneqarnissaa maannakkut sulissutigineqarpoq, Mike Magidson oqarpoq.
Filmilioqataasut Frankrigimiittut USA-miittut Uummannamiittullu tamarmik filmip Kalaallit Nunaanni takuteqqaarneqarnissaanut peqataatinneqarnissaat kissaatigineqarpoq.
- Tamarmilli katersuunneqarnissaannut maannakkut akissaqanngilagut, Mike Magidson oqarpoq.
Filmi novemberip qaammataani Hollandimi takutinneqassaaq, Schweiz-milu decemberip qaammaataani takutinneqassalluni.
