Ilisimatuut: Uulia Nordsømiittoq nungukkallarnavianngilaq
Nordsømi uuliap nungukkiartulerneranik oqalunneq tunngavissaqanngitsoq teknologii nutaaq atorlugu misissuinerit takutippaat, uuliamillu aamma nassaartoqaqqinnera tamanna naqissuserpaa.
Uuliasioqatigiiffippassuit misissuinissaminnut piareeqqapput, koruunillu milliarderpassuit tamatumunnga atorusuppaat. Aviisimi Politikenimi taama allaaserinnittoqarpoq.
Uuliap nappartamut akia 80 dollarit missaanniippoq, uuliasiorniaraannilu isertitassat annertullutik.
Uuliasioqatigiiffiit arlallit uulisiorsinnaanissamut akuersissutinik tunineqareeraluarlutik akuersissutinik allanik ujartuipput.
Nordsømi 1972-imili uuliasiortoqalerpoq, uuliasiorsinnaajumallutillu qinnuteqaateqarsimasut sisamat ukioq manna qinnuteqaateqarsimapput.
Ilisimatuullu naapertorlugit Nordsømi uuliasiorneq unikkallarnavianngilaq. Allaat ukioq 2050-ip kingorna aamma uuliasiortoqarumaartoq oqaatigineqarluni.
