Kalaallit Nunaata eqalussuaa latinerit oqaasiannut nutserneqarsinnaavoq ” itillittartoq qarasaa mikisuararsuaq. Aalisagaq sianiitsutut ilisimaneqarpoq pisariuminarluni ningittakkanullu nammineerluni naatittarluni. Assi: Scanpix

Ilisimatuut qulakkiingajappaat: Kalaallit Nunaata eqalussuaa ungasissorsuarmiittoq

- Tupaallarnarpoq pissanganarlunilu, ilisimatusarfimmi Florida International Universitetimi ilisimatusartoq Devanshi Kasana oqarpoq.

Kalaallit Nunaata eqalussua USA-p kujataani kiattorsuarmi Caribiap imartaani imaani uumarsorsiuunik uissuummissutigineqarluni siumorneqarsimasoq National Geographic  allaaserisaqarpoq.

Nunatta eqalussuaa Caribiap imartaani aatsaavissuaq siumorneqarpoq. 

Eqalussuit eqqartorneqartillugit tupaallannartoqartuaannarnera ilisimatuut nalunngilluaraluarpaat, takusartilli uissuummissutigeqaat. 

- Assut tupaallannarpoq pissangaammernarlunilu, Floridap Universitetimi ilisimatooq, doktori Devanshi Kasana oqarpoq. Taanna eqalussuarnik nalinginnaasumik Caribiami uumasunik nalunaaqutsersuinermi suliaqartilluni eqalussuarnik pisaqartunut ilaavoq.

Eqalussuarmik pisarineqartoq uumasorsiuut atuagassiaanni Marine Biologimi juulimi allaaserineqarpoq.

- Ingerlaannaq malugaarput oqimaatsorsuarmik nassisaqarluta, Hector Martinez ummasorsiuunut ikiuuttoq oqaluttuarpoq. Taakkua aalisaammut amuartaataat sukarujussuarsimavoq akunnernilu marlunni amualuusaareerlutik eqalussuaq qaqippaat.  

Eqalussuaq suussusersinaveeramikku assilillugu Floridami suleqatiminnut nassiuppaat, taakkulu Marine laboratoriamut akvariamullu nassiussimavaa, taakkualu akisimapput  tassaassagunavissoq Kalaallit Nunaata eqalussua.

Nunatta eqalussuaa Caribiap imartaani siullermeersumik siumorneqarpoq. 

Ilisimatusartut nunatta eqalussuanik kiattup imartaani takusaqarnerat ilumut Kalaallit Nunaata eqalussuata Issittup imartaani kisimi uumasinnaaneranik qulalersitsivoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl