Ilisimatuut Nuummi naapipput
Issittumi ilisimatusarnerit pillugit nunaqarsuaq tamakkerlugu peqataaffigineqartumik arfinilissaa ataatsimeersuarneq ilisimatusartunit 400-t missaanniittunit peqataaffigineqartussaq kulturikkut illorsuarmi Katuami sapaatip-akunnerata naanerani ingerlanneqassaaq.
Ataatsimeersuarneq tamarmi tuluttut ingerlanneqartussaavoq akileeqqaarlunilu iserfiusinnaassaalluni. Sapaammili akeqanngitsumik isertoqarsinnaassaaq, tassanimi ilisimatusaatit inernerigallagai Nunat tamalaat issittumi ukiorititaannut tungasut qitiutinneqassapput
Aamma ulloq taanna sapaammi unnukkut, Inuit Issittormiut Kattuffiata ICC-p aaqqissugaanik, silap pissusaata allanngornera qanoq issittumi nunalinnut misinnarnersoq pillugu tamanut ammasumik ataatsimiititsisoqassaaq. Katuami pissaaq, kalaallisut tuluttullu oqaatsit atorneqassallutik.