Ilisimatuut Nuummi ataatsimeersuassapput

Ataatsimeersuarnissatsinnut siunertaavoq ilisimatuunik katersuutitsinissaq taamatuttaaq politikkerinik kiisalu nunap inuiinik katersuutitsinissaq taamaalilluta inuit inuiaqatigiinnilu killiffik takulluarumallutigu, ilisimatooq Birge Poppel oqarpoq.

Taanna erseqqissaavoq piffissami kingullermi silap allanngoriartornera pillugu sumi tamaani assut soqutiginnittoqarsimaqisoq. Tamannalu soqutiginninneq ilisimatusartut akornanniiinnerusimammat ataatsimeersuarnissamut aaqqissuisup Birger Poppelip pingaartuunerarpaa inuit issittumi najugallit tamanna pillugu iluamik paasitinneqarnissaat soorlu allanngoriartornerup tamatuma inunnut nunami najugaqavissunut qanoq kinguneqarsinnaaneranik.

- Aap sila allanngoriartorpoq kisianni Kalaallit Nunaanni aamma allatigut allanngoriartorneqarpoq uangalu ilimagisinnaavara, soorlu assersuutigalugu Maniitsup eqqaani aatsitassanik piiaanerup allanngoriartorfiunissaa tamannalu aningaasatigut kulturikkut allatigullu eqqorneqaataasinnaavoq, taamaattumillu maanna ataatsimeersuartitsivugut oqaluuseralugulu takulluarumallutigu assigiinngitsutigut allannguutit sorpiaat pineqarnersut. Soorlu inuit atugassarititaannut tamanna qanoq sunniutissanersoq, siunissami ungasinnerusumi issittumi oqaatsit qanoq pileriartuaassappat?, allanngoriartussappat? Taamaanngippat suna peqqutaasimassava?, taaamatuttaaq inuit peqqissusaat qanormita issava? Birge Poppel oqarpoq.

Taama ataatsimeersuartitsineq aqqutaalluni inuit tamanna pillugu oqalliseqalernissaat ilisimatuup Birge Poppelip neriuutiginerarpaa.