Ilisimatuut nannunniaqataasut
Ilisimatuut Danmarkimiit, USA-miit, Norge-miit Canada-miillu manna Illoqqortoormiut eqqaanni Uunartimi inissikkallarput. Tassanngaannik nanannunniarneq malinnaaffiginiarpaat pingaarnertut siunertaralugu nannut neqaannit misissugassanik katersinissaq.
Tassani ilisimatuut piniartullu suleqatigiipput ilisimatuut paasiniarmassuk akuutissat arrortikkuminaatsut nannut neqaanniittut qanoq annertutiginersut, taama Danmarkimi avatangiisinik misissuisoqarfik Danmarks Miljøundersøgelser DMU allappoq.
Siusinnerusukkut uppernarsineqareerpoq nannut neqaat annertuumik akuutissanik arrortikkuminaatsunik akoqartartoq. Taamaattorli tamakku annikilliallannerat maluginiarneqarpoq akuutissanik PCB-mik aamma DDT-mik atuineq annikillimmat.
Akuutissat tamakku arrortikkuminaatsut inunnut aamma sunniuteqarsinnaapput.
- Ernumanartut tassaapput peqqinnissamut tunngasut, inuup akiuussutissaqarnera aammalu kinguaassiorsinnaanerata innarlerneqarsinnaanera. Tamanna DMUmit nunanillu allaneersut ilisimatusarneranni paasineqarpoq, taama DMU nittartakkamini allappoq.
Maanna nannuttarineqartut neqaannit misiliutitut katersat takutinniartussaavaat ineriartorneq suup tungaanut ingerlanersoq. Ilisimatusarnermit tassannga angusat atorneqassapput akuutissat arrortikkuminaatsut annikillisarniarlugit nunani tamalaani suliniarnermi tunngavilersuutitut.
Illoqqortoormiuni 35-inik nannuttassaqarpoq tassalu piniartut pisaannit misissugassat katersorneqassapput.
