Arnavissat ikinnerpaamik marluk suaqalereersimasut angutivissallu pingasut aamma Nuummi sassaarineqarlutik. Assi: Jens Sikemsen.Assi: Naturinstituttet

Ilisimatuut kapisilinnik qatigalinnik misissuineranni Facebook pinngitsuugassaasimanngitsoq

Kapisillit qatigallit Kapisilinni kapisilinnut ajoqusiisinnaasut, Pinngortitaleriffik naliliivoq.

Aalisartoq, Kunuk Abelsen siorna aggustimi nalinginnaanngitsumik pisaqarami Pinngortitaleriffimmut attaveqarpoq.

Tassuma Manerassuup kapisiliisa ilaannik pisarnini uumassusilerisunik soqutigineqassasoraa.

- Tasiilami saaffiginnittoqarnera aallaavigalugu kapisilinnik qatigalinnik amerlanerusunik suli peqassasoq ilimagigatsigu Facebookkikkut ujarlerniarluta aalajangerpugut, uumassusileritooq, Julius Nielsen, suliamik ataqatigiissaarisuusoq oqarpoq.

Facebookimillu atuisut nalunaaruteqarluarput. Avannaanit Upernavimmit kujataanit Qaqortumit tunumiillu Tasiilamit kapisillit qatigallit katillugit 84-it nalunaarutigineqarput.

Nalunaarutigineqartunit 76-it 2019-imi pisarineqarput, arfineq-pingasullu 2013-imit 2018-imi pisarineqarnikuusimallutik.

Kapisilik qatigalik siulleq 1969-imeersuuvoq, tamatumalu kingornatigut ilaanneeriarluni Pinngortitaleriffimmut nalunaarutiginnittoqartarpoq.

Kapisilinni kapisilinnut ajoqusiisinnaasoq

Ukiunili siullerni Facebookimit ikiorneqanngilaq, taamaammat nunatta imartaani kapisilinnik qatigalinnik peqarnersoq Pinngortitaleriffiup oqaatigisinnaanngilaa.

- 2019-imili Kalaallit Nunaanni kapisillit qatigallit siornatiguminngaarniit amerlanerulersimanissaat ilimanaateqarpoq. Paasissutissaatitsinniilli tamanna naliliiffigisinnaanngikkallarparput, Julius Nielsen nassuiaavoq

Julius Nielsen kapisilinnik qatigalinnik Facebookikkut ujartuinerminut assingusumik piffissami aggersumi ujartueqqinniarpoq. Periusermi taanna sukkasuumik paasissutissarsiffigissallugu pitsaasuusoq, Pinngortitaleriffik tusagassiuutinut nalunaarummi allappoq.

Nunatsinni Pinngortitaleriffimmit ilisimatuut kapisillit qatigallit nunatsinniinnerat Kapisilinni kapisilinnut ajoqutaaratarsinnaasoq nalilerpaat.

Kapisilinnik qatigalinnik nalunaarutigineqartunit ataaseq Nuup Kangerluani Kapisillit kuuaneersuuvoq, sumiiffillu taanna issittup kapisiliata suffigisartagaatut ilisimaneqartuuvoq. Kapisilinni kapisillit nunatsinni uumasuni mianerisariallit allattorsimaffianni ”mianerisarialittut” allattorsimaffimmi ilaavoq.

Kapisilik qatigalik Europa avannarlermi tamarmi uumasoqatiminut ajoqusiisinnaasutut isigineqartarpoq, ukiunilu aggersuni siammarternerulersinnaanissaa ilisimagineqarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat