Ilisimatuut: Issittoq pillugu ilisimasassarsiorneq navianartorsiortinneqarpoq
Danskit nuna allamiullu ilisimatusartut isumaqarput Ilisimatusarnermut avatangiisit imaannaanngitsut ileqqutoqqanullu tunngasut navianartorsiortut. Ilisimatusarnermut ministeri, Helge Sander, Folketingillu Kalaallit Nunaannut tunngassuteqartunut ataatsimiititaliaa, ilisimatusartunit ammasumik allaffigineqarput, "danskit nuna allamiullu ilisimatusarnermut avatangiisiisa oqaluttuarisaanermut tunngassuteqarlutillu nunanit tamanit akuerisaasut navianartorsiortinneqarnerat iliuuseqarfigeqqullugu". Aviisi ullormut saqqummersartoq, Information, ullumi saqqummersoq, taama allaaserinnippoq.
Ajornartorsiutaanerpaavoq Issittoq pillugu atuakkanik atorniartarfiup kalaallit atugarisaat pillugit katersugaatai siammakaasussanngussammata, amerlanersaallu toqqorneqassallutik.
- Issittoq pillugu ilisimatusarnermut tunngassuteqartut timitallit, ilisimatusartunik nunanit allaneersunit ussagarluarneqartarsimaqisut, kisiisa annaassanngilavut. Ilisimatusarneq pilersinneqarsimasoq siammakaatinneqaruni aserorneqassaaq, Københavnip Universitetiani professori, Jens Dahl, oqarpoq.
Folketingimut ilaasortap, Juliane Henningsenip, ilisimatusarnermut ministeri maanna ataatsimeeqatigisussanngorpaa.
- Issittoq pillugu ilisimatusarneq ilisimasallu ajornerulersittariaqanngillat, pingaartumik silap pissusaata allanngoriartornera massakkut taama qitiutigitillugu, tamanna kialuunniit orniginartinnavianngilaa, Juliane Henningsen oqarpoq.