Ilisimatuut naasuusanik koraaleqarfik 60 kilometerisut annertutigisoq assilioraat

Nuup avataani immap naqqani naasuusanik koraaleqarfik qituttunik koraaleqarpoq, qituperaqarpoq, issuatsiaaqarpoq pissuseqatigiiaanillu allanik assigiinngitsut 150-it missaaniittunik uumasoqarpoq.

Naasuusaanik koraaleqarfik Toqqusap Ikkannersuata eqqaaniittoq 60 kilometerisullu annertutigisoq, immap naqqata sivinganerani 274 meterit 585 meterillu akornanni ititigisumiippoq.

Tamanna naasuusanik koraaleqarfiup assingani ilisimatuut Pinngortitaleriffimmeersut, University College Londonimeersut aamma Zoological Society of Londonimeersut suliaanni erserpoq.

- Naasuusanik koraaleqarfik taanna kiattup orpippassuinut sanilliussinnaavara. Pisoqaaqisunik tappiorannartorpassuaqarpoq, taakkualu uumasut naasullu pissuseqatigiiaat allarpassuit uumaffissaannik pinngortitsisarput, Pinngortitaleriffiup silap pissusianik ilisimatusarfiani misissuisuuneq Martin Blicher oqarpoq.

Naasuusanik koraaleqarfik 2018-imi nassaarineqarpoq, ilisimatuullu nassaarineqarneraniilli tamaat assiliulerpaat. Ilaatigut assit immiussallu 1.200-t missaat iluaqutsiullugit taamaaliorput.

Aalisarneq eqqissisimatitsinerlu

Naasuusanik koraaleqarfiup assiliornera taassuma eqqissisimatitaaneranik tassanilu aalisarnermut qanoq kinguneqassanerata apeqquserneqarnerannik kinguneqarpoq.

- Naasuusanik koraaleqarfik assilioriigarput itisuumi qaleralinniarfiusartup, ikkannerumaami raajarniarfiusartup aammalu saarullinniarfiulerlaap qiterpiaanni inissisimavoq, misissuisuuneq Martin Blicher oqarpoq imalu naliliilluni:

- Aalisarfinnut MSC-millu allagartaliisarnermut aammali pinngortitamut oqartussaasoqarfimmut isumaqatigiissutinullu ilannguffiginikuusatsinnut atatillugu aalisarnermi aqutsinermut attuumassuteqarluinnarmat soorunami apeqquserneqarpoq.

Nunarput assersuutigalugu uumassusillit assigiinngisitaarnissaannik isumaqatigiissummut aamma Oslomi Parisimilu nunat tamalaat immami avatangiisinik eriagininnissaannut isumaqatigiissutinut (OSPAR) ilanngunnikuuvoq.

Tappiorannartut ilarpassui alliartupiloortanngimmata kinguaassiorniapiloortarmatalu naasuusanik koraaleqarfik qajassuuttariaqartoq, Pinngortitaleriffik isumaqarpoq.

Taamaammat Naalakersuisut naasuusanik koraaleqarfik taanna immami avatangiisitut qajassuuttarialittut VME-qarfinngorlugu eriagisassatut nalunaarsortariaqaraat, Pinngortitaleriffik isumaqarpoq.

- VME-qarfittut nalunaarsortariaqarnera ilisimatuussutsikkut allaatigisatsinni innersuussutigaarput, kisianni aalisarnermut, piniarnermut nunalerinermullu naalakkersuisup tamanna naggataatigut aalajangigassaraa, silap pissusianik ilisimatusarfimmeersoq Martin Blicher oqarpoq.

Taassuma eqqissisimatinneqalernissaa oqallisaalereersoq, kisianni avatangiisinut naalakkersuisoqarfik aamma aalajangeeqataasussaammat tamatuma aalajangiivigineqarnissaa sivisusinnaasoq, aalisarnermut naalakkersuisoqarfik KNR-imut ilisimatitsivoq.

Naasuusanik koraaleqarfiup eqqaa inuussutissarsiutigalugu aalisarfiunngimmat eqqissisimatitaalernissaa "aningaasartuutaangaarnavianngitsoq", naalakkersuisoqarfiup pisortaanerata Jørgen Isak Olsenip ilanngullugu oqaatigaa.