Ilisimatuut 400-it nunarsuaq tamakkerlugu ilisimatusarnissamik piareersaapput

Issittumi ilisimattuut 400-t sinnerlugit ulluni makkunani Københavnimi katersuupput issittumi ilisimatusarnerup ukiuni tulliuttuni 15-ini qanoq ingerlanneqarnissaanik pilersaarusiorlutik.

Dansk Polar Center-imi, Danskit issittoq pillugu ilisimatusarfianni pisortaq, ataatsimiinnermi aaqqissuusseqataasoq Hanne Petersen oqarpoq.

- Ilisimatusarnermi misissukkat aallaavigalugit siunnersuuteqartarneq pingaarnertut isigineqarpoq. Inuit aalajangiisussat tunngavissaqarluarlutik aalajangiisinnaaniassammata, Hanne Petersen oqarpoq.

Issittumi ilisimatusarnerup nunanit tamanit peqataaffigineqartumik pilersaarusiorneqarnissaa ataatsimeersuarnermi siunertarineqarpoq. Nunat killeqarfii akormorlugit suleqatigiinneq tamanut iluaqutaasartoq siusinnerusukkut misilittakkat takutippaat.

Ataatsimeersuarneq ukiut qulit matuma siornatigut assingusoq ingerlanneqarpoq tamatumalu kingorna Issittumi siunnersuisooqatigiit pilersinneqarput. Ilisimatusarnermilu paasisat assigiinngitsorpassuarnut ilanngullugit tassani maanna oqallisigineqartarput.

-Issittumi nunat tamarmik ataatsimoorussamik suliassanik tulleriiaarinerminni pilersaarusioqatigiinnissaat pingaartutut isigaarput.

Naalakkersuinermimi suliaqartut ukiuni qulini tulliuttuni ilisimatusarneq qanoq ingerlassanersoq aalajangertarmassuk taamaalilluta immitsinnut ikioqatigiilluarsinnaavugut.

Nunat killeqarfii akimorlugit ikioqatigiilluta paasissutissanik avitseqatigiittarnerput maannamut iluaqutigeqisarput aamma ingerlaqqinniassaaq, pisortaq Hanne Petersen mobiltelefuunikkut Katersugaasivissuup kiilerianit oqarpoq.

Københavnimi ataatsimeersuarnermi Pinngortitaleriffik aamma peqataatitaqarpoq.