Ilisimatuut 150-it Nuummi katersuutissapput

Ulluni aggustip 25-annit 27-annut Nuummi kulturip illorsuani Katuami "Nuuk Climate Days 2009" qulequtaralugu ilisimatuut nunanit tamalaaneersut 150-init amerlanerusut Nunatsinni Issittumilu silap allanngornerata killiffia siunissamilu allannguutit kingunissaat naliliiffiginiarlugit katersuutissapput.
Allattoq Elisa Isaksen
aggustip 17-at 2009 17:16

Nuuk Climate Days 2009 Pinngortitaleriffimmi Silap pissusianik Ilisimatusarfimmit, Danmarks Meteorologiske Institutimit kiisalu Danmarks Tekniske Universitetimit, DTU-mit suleqatigiinnikkut aaqqissuunenqarpoq. Aggustip 25-anni ammaanersiornissaq kikkunnut tamanut ammatinneqassaaq.

Ataatsimeersuarneq Naalakkersuisut siulittaasuannit aallarnerneqassaaq, tamatumalu kingorna ilisimatuut immikkullu ilisimasallit aalajangersimasut Nunatsinni Issittumilu silap allannguutaasa killiffii pillugit ilisimatuussutsikkut paasisanik kikkunnut tamanut ammasumik oqalugiarniarput, ilaatigullu silap allanngornerata inuiaqatigiinnut kalaallinut soorlu piniarnikkut, angallannikkut pinngortitallu pisuussutaanut aatsitassarsiornermullu tunngasutigut ajornartorsiutaalerumaartut periarfissaalerumaartullu eqqoriaavigissallugit.

Tamakku ataatsimeersuarneq aallartinneqarpat pissapput, soqutiginnittullu kikkulluunniit ullormi tassani peqataasinnaassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq