Ilisimatuup danskiusup sermersuup isertugaataa paasisaqarfigaa
Issittup imartaani nunataanilu ilisimatuut misissuinerannit paasisutsissat satellitsi aqqutsigalugu pigineqartut ukioq 2000-mingaanneersuupput. Taakku saniatigut Ilisimatuup Kurt Kjærip danskiusup isumassarsinermigut 80-sikkunni ilisimatuutut misisuinermi assilisat atorlugit maanna sermersuup isertugaataanik siullersaalluni paasisaqarpoq.
-Sermersuup milliartuinnarneranut peqqutaasut marluupput. Tassalu sermit kaanngartartut alliartuinnarnerat, kiisalu kiak annertooq ukiuni makkunani Kalaallit Nunaanni misigisassaasoq. Ilisimatuutut misissuinitsinni paasisat nutaat takutippaat sermersuarmit sermeq annertooq kaanngartartoq piffissami aaliangersimasumi pisartoq. 1985-miit 1993 tikillugu sermeq annertooq semersuarmit kaanngarsimavoq. Kingornalu tassa 1993-miit 2005 tikillugu sermik kaanngartoq annikitsuinnaariarluni, kingorna ukiuni tallimani sermeq kaanngartoq annertuseqqissimasoq. Taamaalillutalu sermeq annertooq sermeruarmit kaanngartartoq piffissami aaliangersimasuni pisartoq paasivarput, Københavnip Universitetiani Lektori Kurt Kjær, oqaluttuarpoq.
Assit nutaanngitsut nutaaliaanerusunik ilallugit misissuineq Kurt Kjærimut suleqataanullu ukiuni aggersuni sermersuup qanoq pisoqarfiunissaanut takussutissiilluarput.
- Misissuinitsinni ukiut aqqaneq marluk iluani pisut malinnaaffigereerlugit maanna ukiut 27-it ingerlanerini pisut misissuiffigaagut. Tamannali tamaannga killeqanngilaq. Assimmi 160.000-inik amerlassuseqartut ukioq 1932-imit assilineqarsimasut atorlugit misissuissaagut. Taamaalillutalu ukiut 80-it ingerlanerini sermersuup qanoq periuseqarsimanera misissuiffigissallutigu. Neriuppungalu assitoqqat atorlugit ilisimasat nutaat paasisagut uppernarsarsinnaalerumaarlutigit, taamaalillutami sermersuup qanoq pisoqarfiunera ilisimalikkat malillugit isiginialersinnaagatsigu, Kurt Kjær maanna Kalaalit Nunaanniittoq taama naggasiivoq.
