- Kukkunersiuinermut ataatsimiititaliap taama sakkortutigisunik oqaaseqarneranik allamik maannakkut eqqaamasaqarsinnaanngilanga, Birger Poppel oqarpoq.Assi: KNR

Ilisimatuup ataatsimiitialiaq taama sakkortutigisumik isornartorsiuereersimanersoq eqqaamanngikkaa

Kukkunersiuinermut ataatsimiititaliaq qaqutigut taama sakkortutigisumik isornartorsiuisartoq, inuiaqatigiilerinermik Ilisimatusarfimmi ilisimatooq oqarpoq.

Kukkunersiuinermut ataatsimiititaliap nipisattassiissutinut suliamut nassuiaatini ataasinngormat saqqummiussaani Kim Kielsenimik (S) isornartorsiuineq sakkortuvoq.

Ataatsimiititaliap isornartut pillugit oqaaseqaatigisinnaasamini sakkortunerpaaq atorpaa. Oqaaseqaallu immaqa aatsaat atorneqartoq, ilisimatooq Birger Poppel naliliivoq.

Ataatsimiititaliaq nassuiaammini ima allappoq: "...ataatsimiititaliap sakkortuumik uparuarpaa tamannalu Inatsisartunut immikkut maluginiaqqullugu." Oqaaseqatigiillu taakku qaqutigorujussuakkut atorneqartarput.

- Kukkunersiuinermut ataatsimiititaliap taama sakkortutigisunik oqaaseqarneranik allamik maannakkut eqqaamasaqarsinnaanngilanga, Birger Poppel oqarpoq.

AAMMA ATUARUK Kim Kielsen sakkortuumik isornartorsiorneqarnerminut akissuteqarpoq: Tusaatissatut tiguneqarpoq

Aamma suleqatiminik oqaloqateqareerluni suleqataasa siornatigut taama oqaaseqaateqartoqarsimanersoq eqqaamanngikkaat ilisimatooq oqarpoq.

Kukkunersiuinermut ataatsimiititaliap allattoqarfia naapertorlugu, oqaaseqaatit sakkortussusaannut immikkut uuttuut ukiuni pingasuni sisamaniluunniit kingullerni atuuppoq. Allattoqarfillu ataatsimiititaliamit siornatigut taama sakkortutigisumik oqaaseqaateqarnermik assersuutissarsisinnaanngilaq.

- Taama oqaaseqaateqarnissap ataatsimiititaliamit, partiinit naalakkersuisoqatigiinniittunit marlunnit (Siumut Demokraatillu aaqq.) ilaasortaaffigineqartumit isumaqatigiittumit innersuussutigineqarnera maluginiagassaavoq. Suliap ilungersunarneranik ersersitsivoq. Kisianni Inatsisartuni taama sakkortutigisumik isornartorsiuinissaat nalunarpoq, Birger Poppel oqarpoq. 

Suliaq sivisusoq

Kim Kielsenip umiatsiaminik aalisartumut attartugaqareerluni nipisattassiissutinik qaffaaqataagami attuumassuteqarpallaarnersoq politikerit illuatungiliuttut arlallit juunimi apeqqusermassuk suliaq aallartippoq, ataatsimiitialiallu nassuiaatini septembarip ulluisa arfineq-aappaanni saqqummiuppaa.

Kim Kielsenillu suliamik ingerlatsisimanera sakkortuumik isornartorsiorneqartoq takuneqarsinnaavoq.

Tamatuma saniatigut apeqqutit tamarmik Naalakkersuisunit akineqarsimanngitsut pillugu ataatsimiititaliaq isornartorsiuivoq. 

Demokraatiit tatineqartut

Aamma Inuit Ataqatigiit siulittaasuat, Múte Borup Egede, ataatsimiititaliap nassuiaataa pillugu Qanoruumit apersorneqarami isornartorsiuivoq. Suliaq naammasseqqajanngitsoq, suliarlu Inatsisartunut, politikkikkut kingeqartitsisoqassanersoq aalajangiisussanut, suliassanngortinneqartoq taassuma erseqqissaatigaa.

AAMMA ATUARUK Demokraatit nipisattassiissutinut suliaq pillugu: Isiginngitsuusaarnianngilagut

Birger Poppelilu naapertorlugu suliaq pissutigalugu Kim Kielsenimik tatiginnikkunnaarnermik taasisitsisoqarsinnaavoq.

- Illuatungiliuttuni partiip ataatsip partiilluuniit arlallit ataatsimoorlutik tatiginninnginnermik taasisitsinissaat ilimanassuseqangaatsiarpoq. Aamma oqaaserineqareersut eqqarsaatigissagaanni, inuiaqatigiilerinermut ilisimatooq oqarpoq.

Demokraatillu suliap qanoq inerneqarnissaa aalajangissagaat, Birger Poppel naliliivoq.

- Demokraatit qanoq inissinniarnersut apeqqutaassaaq, Birger Poppel oqarpoq.

Demokraatit siulittaasuat, Jens-Frederik Nielsen, Kim Kielsenimik uppititsinissamik pilersaaruteqarnani siusinnerusukkut oqarpoq.

Allannguisinnaasoq

Kim Kielsenip kukkunersiuinermut ataatsimiititaliap isornartorsiutai tusaatissatut tigullugit, KNR-imut sisamanngormat allappoq.

AAMMA ATUARUK Revisionsudvalget rejser skarp påtale af Kielsen i stenbidersag

Birger Poppelilu naapertorlugu, suliaq pissutsinik allannguisinnaavoq.

- Kim Kielsen attuumassuteqarpallaarnermut erseqqinnerusunik malittarisassiornissamut kissaateqarluni oqareerpoq.

- Taamaammat tamanna isumalluutitta pingaarnersaannut ingerlatsivimmi eqqumaffigineqarnerunissaa neriuutigineqarsinnaavoq, Birger Poppel oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat