Ilisimatusartut immap naqqani nakkutiginninnissamut millionilinnik aningaasaliiffigineqartut
Nunatsinni immap naqqa qanoq isikkoqarpa?
Kangerluit imartaata naqqani naasut uumasullu aalisarnermut periarfissanut imaluunniit CO2-mik nalinginnaasumik aniatitisinermut qanoq sunniuteqartarpat?
Kilisannerit silallu pissusiata allanngoriartornera immap naqqani uumassusilinnut qanoq kingunerluuteqarpa?
Apeqqutit tamakku Nunatsinni Silap Pissusianik ilisimatusarfimmit Nunatsinnilu Pinngortitaleriffimmit ilisimatusartut misissorniartussanngorpaat.
Ilisimatusartummi nunatsinni immap naqqanik erseqqissaanissamut misissueqqissaarnissamullu EU-p”mingutsitsinnginnerulernissamut” suliniutaanit 17,2 millionit koruuninik ukiunut sisamanut aningaasaliiffigineqarput.
Ilisimatusarfiit marluk ataatsimut tusagassiuutinut nalunaarummi allapput.
Itisuut ilisimasaqarfigineqanngitsut
Naak ilisimatusartut oqarnerat naapertorlugu immap naqqa sananeqaatinut uumassuseqassutsimullu pingaarluinnaraluartoq ilisimasaqarfiginera killeqarpoq. Nunatsinni sineriak ilisimatusarfigineqanngitsunik kangerluppassuaqarpoq, tamatumalu saniatigut immap naqqani uumassuseqassuseq ilisimasaqarfigineqarani.
Taamaammat ukiuni sisamani ilisimatusarnissamut suliniut immap naqqani uumassusillit assigiinngisitaartut taakkulu atuuffiisa ilisimasaqarfiginerulernissaannut periarfissiilluassaaq.
Maannalu taamaaliortoqarsinnaalernera, Nunatsinni Silap Pissusianik Ilisimatusarfimmi aqutsisup, Mie Windingip nuannaarutigaa.
- Kalaallit nunaata immata naqqa erlinnartuusivigaarput. Immalli naqqa qaammammilluunniit ilisimasaqarfiginnginneruarput. Immami uumassusillit avatangiisai pissusaallu paasiniaaffigissavagut, taanna oqarpoq.
Aamma Pinngortitaleriffimmi suliniummik aqutsisup, ilisimatusartullu Nadescha Zwerschkep imaani itisuumi ilisimasaqarfiginngisat ilisimasaqarfiginerulernissaat qilanaaraa.
- Aningaasaliinerup kingunerissavaa, immap naqqani sumiiffiit misissorneqarsimanngitsut sannaasa uumassuseqassusaatalu ilisimatusarfigilernissaat. Taamaalillutalu Kalaallit Nunaanni, immap naqqani sumiiffiit immikkut pingaarutillit erseqqinnerusumik paasisaqarfigissavagut, taanna oqarpoq.