Ilisimatusartut: Iluaqutiginiarneqarsinnaavoq

Taama qulequtserlugu suliniartoqalerpoq. Suliniuteqartuullutik silap pissusaanik issittumilu ilisimarusartoq Sebastian Mernild aamma ilisimatusarfimmik aqutsisoq Jens Hesselberg suleqataallu.

Mernild New Mexicomi misissuisarfimmi Los Alamos National Laboratorymi sulisuuvoq, Hesselberg Danmarkimi sila pillugu ilisimatusarfimmi aqutsisuulluni.

Saqqummiussaat atuagassiami Journal of Climate-mi saqqummeqqammerput. Kitaa ullumimiit 2080-imut 2,9 gradinik kiannerulissaaq ukiumullu sialuk apullu nakkaasoq 50 mm-inik qaffariassalluni.

Sermersuarmik sukkanerusumik aakkiartortitsissaaq imerlu imaanut kuugussaq annertuseriassaaq.

Ulittarneq qaffariassasoq aamma eqqoriarneqareerpoq aammali imeq atorlugu nukissiorneq periarfissaqarnerulissangatinneqarpoq, ilisimatuut allapput.

Ilimagineqarpoq Kangerlussuarmi imeq kuuttartoq 55 procentiminik alleriassasoq, tassa ukiumut liiterinit 1.100 milliardinit 1.700 milliardinut 2080-imi qaffassangatinneqarluni.

Kangerlussuarmiinnaanngitsoq aammali sinerissami sumiiffinni allani piukkunnarsinnaasunik CO2-mik aniatitsinngitsunik nukissiorfiliortoqarsinnaasoq aamma oqaatigaat.

- Kitaani engup nukiliorfissaqqissorpassuaqarpoq, taakkunani silap qanoq issusaa sermillu aakkiartornerata annertussusaa assigiikanneramik, Sebastian Mernild oqarpoq.

Aammali sermip aakkiartupiloornera ajoqutitaqarsinnaasoq oqaatigaa.

- Kalaallit Nunaata sermersua ukiut 30-t qaangiuppata ima aakkiartupiloortigisimasinnaavoq, nunarsuarmi CO2-mik gassinillu allanik aniatitsineq millisinneqaraluarpalluunniit aallaat ukiut untritilikkaat, immaqaluunniit ukiut tuusintilikkaat qaangiutsinnagit sermersuanikkiartoqqissinnaassanani.