Jeppe Strandsbjerg Ilisimatusarfimmi lektoriuvoq aamma naalagaaffiit qulangerneqartussaanngissusiannik ilisimatusartuuvoq.Assi: Jeppe Strandsbjerg

Ilisimatusartoq: Tartupalummi killeqarfiliineq takussutissiineruneruvoq - Kujataatali imartaanut tunngasut soqutiginarnerupput

Tartupalummik avitsineq takussitissiinikkut nalitoqaaq. Soqutigisaqarfittulli pingaaruteqarpianngilaq. Uissuumminartortaraali Kunngeqarfik Danmarkip Canadallu Kalaallit Nunaata kujataata kippasissuani imartaq avillugu killeqarfiliinissamik isumaqatigiimmata.

Danmark, Kalaallit Nunaat Canadalu Tartupaluk pillugu ukiuni 50-ini saqitsaatereerlutik Tartupaluk avillugu killeqarfiliissallutik isumaqatigiipput.

Taamaaliornerat takussutissiinipilussuuvoq, pingaaruteqarpiaranili.

Ilisimatusarfimmi lektori taavalu naalagaaffiit qulangerneqartussaanngissusiannik ilisimatusartoq Jeppe Strandsbjerg taama isumaqarpoq.

- Tartupaluk pisuussuteqanngimmat taavalu Kalaallit Nunaat Canadalu akunnnerminni imartami killeqarfeqareermat, killeqarfiliornerup pingaarutaa oqariartuutitaaniippoq. Taamaammat Tartupaluup ilarujussuata sortaa kikkunnit oqartussaaffigineqarnersoq apeqqutaaneruvoq. Tassalu killeqarfiliineq soqutigisaqarfittut pingaaruteqarpianngilaq, taanna oqarpoq.

AAMMA ATUARUK Múte B. Egede: Tartupaluup avinnera Inuit ataatsimoorfigissavaat

Nunalli marluk taakkua killeqarfiliiginnanngillat.

Kalaallit Nunaata Canadallu akornanni imartamut tunngasut soqutiginarnerupput

Tassami Danmark, Kalaallit Nunaat Canadalu avannaaniit kujammut titaallutik nunarsuarmi imartani isorartunerpaamik aamma killeqarfiliipput.

Jeppe Strandsbjergillu tamanna arajutsisimanngilaa.

- Taamaaliorneq eqqumaffigineqarpianngilaq, tassami Kalaallit Nunaata kujataata-kippasissuaniittussamik Canada, Danmark Kalaallit Nunaallu nunavissuit toqqavii atuarlugit killeqarfileeqatigiipput. Imartap tamatuma naqqa Kunngeqarfik Danmarkip Canadallu tamarmik immikkut oqartussaaffigilerusutarisaraat, lektori oqarpoq.

Nunat taakkua immikkut immap naqqa tamanna, nunavissuup toqqaviata inisissisimaffigisaa, oqartussaaffigilerumallugu  Naalagaaffiit Peqatigiinnut (FN-imut) piumasarisinnaavaat.

Nunavissuilli toqqavii tamaani qaleriissitaarmata, nunat arlallit tamatumuminnga piginnittuusinnaatitaaffeqarsinnaasut, FN aalajangersinnaavoq. Taamaalippallu nunat aaqqiagiinngitsut isumaqatigiinniartussanngussapput.

Tassalu Kunngeqarfik Danmark Canadalu Kalaallit Nunaata kujataata kippasissuani imartaq avillugu killeqarfileeqatigeeqqammerput.

AAMMA ATUARUK Tartupaluk pillugu isumaqatigiissut maanna atsiorneqartoq

Tassa imaappoq, nunatta Canadallu imartami tamaani pisuussutit, soorlu raajat, avissinnaavaat.

- Avitseqatigiinnissaminnut isumaqatigiinniapilooqqaarnissaat ilimagineqarsimasinnaagaluarpoq. Taamaammat maanna isumaqatigiinnerat tupaallannalaarpoq. Taamaammallu Tartupaluk avillugu killeqarfiliinerannit nutaarsiassatsialaanerusoq aamma isumaqarpunga.

Kunngeqarfik Danmarkip Kalaallit Nunaata avannaata imartaata naqqani nunavissuit toqqavii aamma oqartussaaffigilerusuppai. Tamakkuali Canadap Ruslandillu piginnittuuffigerusutaannut, soorlu Qalasersuup naqqanut, aamma qaleriissitaarnerat ajornartorsiutaavoq.

Taamaammat Kunngeqarfik Danmarkip Canadallu imartap naqqani nunavissui toqqaviinik avitseqatigiinnissamut ajornaatsumik isumaqatigiinnerat takussutissinneruvoq pingaartoq.

- Tamanna siunissami isumaqatigiinniarnernut sunniuteqartussamik qanoq isumaqatigiinniartoqarsinnaaneranik tunngavissiinerunertut nalilerneqarsinnaavoq, taamaalillunilu saqitsaakkunnaarniarnerujumaartussat aamma sunnerneqarput, Jeppe Strandsbjerg oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl