Kina issittumi: Ilisimatusartoq misissuinissaminut aningaasaliiffigineqartoq
Kina nunani avannarlerni akoorusunnera isertuussassaanngilaq. Taamaannera Kalaallit Nunaannut Danmarkimullu periarfissanik nutaanik unammilligassanillu pilersitsiva?
Liselotte Odgaardip tamanna qaammarsaavigissallugu misissuiffigisussanngorpaa. Misissuineralu 'Kinas maritime ambitioner i Arktis og Østersøen'-imik ateqarpoq, kalaallisuunngorlugu "Kinap nunani avannarlerni Østersømilu immakkut angallannikkut angusaqarusussusaa" nutserneqarsinnaalluni. Immakkut angallannermi nunanut allanut sillimaniarnermut illersorniarnermullu misissuiffigineqassasoq Forsvarsakademip nittartagaani atuarneqarsinnaavoq.
Ilisimatusartoq 482.500 koruuninik Den Danske Maritime Fondimit aningaasaliiffigineqarpoq, aningaasaliineq misissuinerup iluatsinnissaanik siunertaqarluni.
Misissuineq naammassippat allaaserisanngorlugu USA-mi nunanilu tamalaani aviisini saqqummersinneqassaaq. Aalajangiisartunut inuussutissarsiutinillu ingerlataqartunut Kinap nunani avannarlerni akuuniarnera pillugu oqallissaarutaassasoq Forsvarsakademi allappoq.
