Ilisimatusarsimasut tusagasiuutinit issuarumanerusarpaat

Universitetit ilisimatuutut misissuisartunit aqunneqartut, ilisimatuutut misissuisartuunngitsunit aqunneqartuniit ingerlalluarnerusarput.

Tuluit Nunaanni, Warwick Universitetimeersup Amanda Goodall-ip misissuinerata tamanna takutippaa. Misissuineq pillugu aviisimi Times-imi allaaserinnittoqarpoq.

Universitetini aqutsisut ilisimatuutut misissuisarnerup iluani qanoq misilittagaqarneri, aamma universitetit aqutaasa nunarsuarmi universitetinut allanut sanilliullugit nalilerneqartarnerinut qanoq sunniuteqartarnersut, Amanda Goodall-ip ph.d.-tut ilisimatuunngorniutigalugu allaaserisimavaa. Universitetimmi tamarmik ukiut tamaasa nalilerneqartarput taaneqartartumik – Academic Ranking of World Universities – Shanghai Jiao Tong Universitetimit suliarineqartartumik.

Allaaserisani tutsuiginartuutinniarlugu nammineq Tuluit Nunaanni universitetit 55-it aallaavigalugit aqutsisuisa tusagassiuutini qanoq issuakulaarneqartigineri misissorsimavai. Misissuinerillu inerneri ersarilluinnarput; Universitetit pitsaanerit aqutsisui pitsaannginnerit aqutsisuiniit pingasoriaammik tusagassiuutitigut issuarneqakulanerupput.

- Amanda Goodallip nammineq oqarneratuut; imaappoq, nunarsuarmi universitetiniit ataqqineqarusukkaanni nunarsuarmi ilisimatuutut ataqqineqartumik aqutsisoqartariaqarpoq.

Amanda Goodallip suliffeqarfinni pisortat apersoramigit paasivaa, ilisimatuutut misissuinermik misilittagallit, universiteti aqutartik tutsuiginarnerulersittaraat, ilinniagartuussutsikkullu maligassiisarlutik kiisalu universitetip kulturia isersimaffiginerusarlugu.

Aviisi Times allappoq, misissuinerup inerneri atuaganngorlugit saqqummersinneqassasut.