Ilisimatusarsimasoq: Nunaqarfiit illoqarfinnut naleqqiullugit aningaasartuutaanerunngillat
- Ataatsimut isigalugu nunaqarfimmiut illoqarfimmiunut naleqqiullugit aningaasartuutaanerunngillat. Tamanna tupaallannalaarpoq, aamma uannut, ilisimatuutut misissuisimasoq Kåre Hendriksen oqarpoq.
Taanna Ilisimatusarfik suleqatigalugu Nunatsinni nunaqarfiit pillugit unnugu oqalugiassaaq, oqallitsitsissallunilu.
Kåre Hendriksenip ilisimatuutut misissuinini aallaavigalugit nunaqarfiit aningaasaqarnikkut, inuussutissarsiornikkut isumaginninnikkullu ineriartornerat pillugu oqalugiassaaq. Ilisimatuutut misissuinini januaarimi taassuma illersorpaa.
Nunaqarfimmiullu illoqarfimmiunut naleqqiullugit aningaasartuutaanerunngitsut, misissuinermi inernerit pingaarnersaraat:
- Nunaqarfimmiut ataatsimut isigalugu aningaasartuutaanerunngillat. Isumaginninnikkut aningaasartuutit misissuataaraanni takuneqarsinnaavoq innuttaasut ilinniarsimanngitsut suliffeqanngitsulluunniit akornanni nunaqarfimmiut illoqarfimmiunut naleqqiullugu isumaginninnikkut aningaasartuutaannginnerusut, Kåre Hendriksen oqarpoq.
Nunap immikkoortuani sumi najugaqarneq aamma apeqqutaasoq, taassuma oqaatigaa. Nunaqarfiimmi ataasiakkaat aalisarnikkut tunitsiveqarnikkullu nunaqarfinnut allanut naleqqiullugu ingerlalluarnerunerat aamma puigorneqassanngitsoq, oqaatigaa.
- Nunaqarfiit ataasiakkaat aningaasarsiussappata tunitsiveqarnissaat allaqqunneqarsinnaanngilaq. Nunaqarfik tunitsiveqanngippat aningaasarsiornikkut ineriartornikkullu killeqassaaq, nunaqarfiit pillugit ilisimatuutut misissuisimasoq Kåre Hendriksen naggasiilluni oqarpoq.
Ilisimatusarfimmi unnugu Nunaqarfiit pillugit oqalugiarnissaq, kingornalu oqallitsitsinissaq nalunaaqutaq arfineq-pingasunut qiteqquppat aallartissaaq, qulingiluallu tungaannut pisussaalluni.