- Assigiiaanik akissuteqarrattut erserpoq. Illoqarfimmiut toqqissisimaqaat, coronallu nunarsuaq tamakkerlugu tunillaassuunnera taakku inuunerisa pitsaassusaanut kalluaangaarsimanngitsoq erserpoq – allaallumi ilaat kiffaanngissuseqarnerulertutut misigisimasimanerarput, Aalborg Universitetimi ilisimatusarsimasoq Naja Carina Steenholdt oqarpoq.Assi: KNR

Ilisimatusarsimasoq: Corona isorliunerusuniunerusoq ernummataasoq

Coronap nunarsuaq tamakkerlugu tunillaassuunnera nunatsinni inuit inuunerisa pitsaassusaanut qanoq kalluaasimatiginersoq, misissuinermi nutaami qulaajarneqarpoq.

Tunillanneqarsimasukitsoq killilersuinerpassuillu.

Coronap nunarsuarmi ukiumi kingullermi tunillaassuutipiluuleruttornerani nunatsinni tunillaassuunnissaa ingalanneqarsinnaasimavoq, tunillanneqarsimasukilluni. 

Covid-19-ilumi nunatsinni inuit inuunerisa pitsaassusaanut innarliisimarpasinngitsoq, inuiaqatigiit pillugit ilisimatusarsimasup Naja Carina Steenholdtip misissuinerani nutaami akissutini erserpoq. 

- Misissuininni apersukkama amerlanerpaartaasa Covid-19 inuunerisa pitsaassusaanut pitsaasumik pitsaanngitsumilluunniit kalluaasimannginnerarpaat. Oqartussat coronap nunarsuaq tamakkerlugu tunillaassuutipiluuleruttornerani iliuuserisaat qanoq toqqissisimanartitsigineraat aperigaangakkit, amerlanerpaartaasa toqqissisimanarteqigitik oqarput. Ikittuinnaat toqqissisimanngillat, isorliunerusuniunerusoq illoqarfinniunngitsorli, Naja Carina Steenholdt oqarpoq. 

AAMMA ATUARUK Politiet udskriver coronabøde på værtshus i Nuuk

Taassuma inuit 16-it Tasiilameersut, Ilulissaneersut, Uummannameersut, Qaqortumeersut Nuummeersuullu 18-it 65-illu akornanni ukiullit apersorpai.

Aamma tusagassiuutit Sermitsiaq AG-ip KNR-illu nittartagaanni oqaaseqaatit, allaatigisarpaaluit Naalakkersuisullu tusagassiuutinut nalunaarutaat tamatuma saniatigut misissoqqissaarpai.

Aarlerinartumi inissisimasut ernumasut

Misissuinermini paasisat coronap nunarsuaq tamakkerlugu tunillaassuunnerata nunatsinni inunnut qanoq kalluaatigisimanerata isummerfiginissaanut naammanngitsut, Naja Carina Steenholdt erseqqissaavoq.

Taakkuli naleqqatut atorneqarsinnaapput:  

- Assigiiaanik akissuteqarrattut erserpoq. Illoqarfimmiut toqqissisimaqaat, coronallu nunarsuaq tamakkerlugu tunillaassuunnera taakku inuunerisa pitsaassusaanut kalluaangaarsimanngitsoq erserpoq – allaallumi ilaat kiffaanngissuseqarnerulertutut misigisimasimanerarput.

Naja Carina Steenholdt Aalborg Universitetimi kulturimik ilinniarsinnaassusermillu ilisimatusarfimmi post.doc-iuvoq. 

- Isorliunerusunerusunili najugallit corona ernummatiginerulaarpaat, aamma inuunerisa pitsaassusaanut inuunerannullumi kalluaaneroqaaq, taanna nassuiaavoq nangillunilu: 

- Isorliunerusunimi najugallit aarlerinartorsiornerpaatut inissisimapput. Taakkunani kiffartuussiviit soorlu peqqissaaviit kutsiorfiusinnaasullu ikinnerummata, taakkunani najugallit ernumanerusut paasinarpoq. 

Naja Carina Steenholdtip Tunu coronamik tunillanneqartoqanngitsoqarfiusoq assersuutigaa, kisianni:   

- Tunumi inuussutissarsiortunut sunniuteqaqaaq. Oqaloqatikka killilersuinernit sunnigaasimaqalutik oqarput. 

Soraarsitaasortaqartut

Ingammik takornarialerisut namminersortuaqqallu coronap tuniluunnerata ajornartoortitsinerani aningaasaqarnikkut aniguiniapiloornerpaasimapput.

Naja Carina Steenholdtillu misissuinermini apersugaasa ilarpaalui taama nalaataqarsimapput. 

- Apersukkakka soraarsitaasortaqaalunnerat tupaallaatigilaarpara. Ingammik takornarialerisortaat, aamma namminersortuarartaat. Covid-19 pissutigalugu nunatsinni suliffissaaleqinerup oqallisaanerunngimmat tupigusuutigaara.

Nunatsinnilu inuit ukiumi kingullermi qiimaaniartuarsimasut misissuinermini paasisani erserluinnarsimasoq, taassuma ilanngullugu erseqqissaatigaa.

AAMMA ATUARUK Ministeriuneq coronamut Danmarkimi akiuussutissaliortaleqqusisoq

- Inuunerup pitsaassusaanik ilisimatusarsimasutut nunarsuaq tamakkerlugu tunillaassuuttoqaraluartoq, inuit inuunermik pitsaasuuinnarnissaanik attassisimasut paasillugu nuannaajallannaqaaq, Naja Carina Steenholdt oqarpoq. Taanna misissuereerluni corona nunatsinni timikkut nappaalaataanani annermik misigissutsikkut sunniussimasoq isumaqarpoq.

- Tunillanneqarsimasukillunilu tuniluuttoqanngingajavippoq. Atuuttorli eqqarsaatigineqartarpoq, ilaannikkullu ernumassutaasarluni. 

Naja Carina Steenholdtip ilisimatusartutut misissuinerani paasisaminit allaatigisaa Tidsskriftet Grønlandimi ukiaru saqqummissasoq pilersaarutaavoq. 

’Covid-19 Kalaallit Nunaanni – Indsigt i pandemiens betydning for liv og livskvalitet i Grønland’-imik qulequtaqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat