Ilisimatusarnissamut 6 millionit koruuninik aningaasaliisoqartoq

Nunammi Avannarliit ministeriisa Siunnersuisoqatigiivisa Issittoq pillugu suleqatigiiffiata Issittumi ilisimatusarnermut atatillugu sulinermi suleqatigiissutissanut 6 millionit koruuninik aningaasaliivoq.

Issittumi avatangiisit silap pissusiata allanngoriartornerata kingunerisaanik ilaatigut eqqorneqarlupput, tamaanilu innuttaasunut aamma sunniuteqarlutik.

Inuit eqqorneqarnerlussinnaapput, periarfissanilli nutaanik aamma ammaassillutik. Issittumi avatangiisit ataqqillugillu mianeralugit periarfissat atorluarneqarnissaat nunat avannarliit taamaammat kissaatigaat. 

Issittumi innuttaasut atuagarisaat pitsanngorsarneqarlutillu ineriartortinneqarnissaat aamma anguniagaavoq.

Aningaasaliissutigineqartut tamakku piviusunngortinneqarnissaannut ilaatigut atorneqassapput.

Ilisimatuut nunatsinneersut Danmarkimeersullu suliniutiminnut atatillugu 500.000 koruunit tikillugit qinnuteqaateqarsinnaapput, suliniutillu ukununnga atorneqassapput: 

Nunap inui pillugit ilisimatusaatit, piujuaannartitsineq aallaavigalugu inuussutissarsiutinik ineriartortitsineq, avatangiisit pinngortitarlu, silap pissusia ilinniartitaanerlu.

Ilisimatusaatigalugu suliniutinut atorneqartussanik qinnuteqarniaraanni ulloq qinnuteqaateqarfissaq kingulleq tassaavoq aappaagu januaarip ulluisa 23-at.