Ilisimatusarnermi Danmarkip peqataanerulernissaa kissaatigaa
Danmarkip Kalaallit Nunaanni ilisimatusarnerit tapersersornerusuuppagit, nunanit tamalaanit isiginiarneqarnerulissagaluarpoq. Tamannali aningaasaliisoqarnerutinnagu pisinnaanngitsoq, nutaarsiassaqartitsivik Ritzau allappoq.
Danmark nunanit allaninngaanneersunut naleqqiullugu nunatsinni ilisimatusarnerpaasarsimagaluarpoq, taamaakkunnaarsimavorli. Tamannalu allanngortittariaqartoq, ujarassiornermik, tassalu Geologisk Institut-imi pisortaq Minik Rosing isumaqarpoq.
- Danmarkip ilisimatusarnermut aningaasaliissutigisartagai ima ikitsigisarput, Kalaallit Nunaanni periarfissat annertoqisut atorneqanngitsoortarlutik. Minik Rosing oqarpoq.
Minik Rosing Kalaallit Nunaanni ilisimatuutut misissuinernut kommissionimi siulittaasuuvoq, isumaqarporlu, nunat tamalaat nunatsinni annertuumik ilisimatusaateqartut sulilu amerlanerusunik ilisimatusarnissamut kissaateqartut. Taamaattorli Danmarkip issittup 98 %-ia oqartussaaffigigaluarlugu aningaasaliissutigisartagai procentimik ataasiinnarmik naleqarput. Taamaattumik Nunat Tamalaat Issittumut Ukiorititaannut 2007-imut atatillugu Danmarkip qangatut suleqataajumassuseqalernissaa kissaatiginerarpaa.
