Ilisimatusarneq aningaasalerneqarli

Issittumi ilisimatusarnermut, aningaasat amerlanerusut aappaagu aningaasanut inatsisissamit immikkoortinneqartariaqartut, Folketingimi Atlantikup avannaani qinikkat suleqatigiit piumasaqarput.

Atlantikup avannaani qinikkat suleqatigiit sinnerlugit Kuupik Kleist Folketingimi Aningaasaqarnermut Naalakkersuisumut, Aningaasaqarnermullu Ataatsimiisitaliamut saaffiginnippoq, ukioq 2007-miit 2009-ip tungaanut nunarsuaq tamakkerlugu issittumut ukioritinneqarnera maluginiaqqullugu.

Atlantikup avannaani qinikkat suleqatigiit partiiunnginnami aningaasaqarnermut inatsisissamut sunneeqataasinnaanngilaq, neriuutigineqarporli saaffiginnissut tusaaniarneqarumaartoq.

Aningaasanut inatsisissami ilisimatusarnermut aningaasaliissutit aappaagu allannguuteqarnatik 6,5 millioni koruuniussapput, immikkut aningaasaliisoqanngilaq, immikkulli aningaasaliissutissatut siunnersuutigineqartut 500 millioni koruuniusut isumaqatigiinniutigineqassallutik.