Ilisimatusarfiup tungaanut akulikinnerusumik bussersinnaalerumapput
Taamaammat illoqarfimmiit Nuussuarmut uterlugulu bussinik attaveqartarnertulli akulikitsigisumik bussersinnaalerumavugut, Ilimmarfiup pisortaa Aage Rydstrøm-Poulsen borgmesterimut Nikolaj Heinrichimut ammasumik taama saaffiginnissuteqarpoq.
- Siornatigut Ilimmarfiup tungaanut bussit akunnerup affakkaartumik aamma unnukkut akunneq iluitsukkaarlugu unittaraluarput. Ajuusaarnaraluartumik maannakkut bussit ingerlaartarnerat annikillisaaffigineqaqqissimavoq, ullaap tungaatigut akunnerit marluk unikkallartalerlutik, aammalu arfininngorneq sapaallu angallassisarunnaarsimallutik. Kiisalu ulluinnarni nalunaaqutaq 17.30-ip tungaannaanut ingerlaartalersimallutik.
Taamatut angallassisarnerit Ilisimatusarfimmuinnaanngitsoq kisiannili aamma Nunatta allagaateqarfianut, Grønlandicamut, Oqaasileriffimmut Naatsorsueqqissaartarfimmullu pakatsissutaaqaat. Sulisut 80-it unnukkut sapaatillu akunnerisa naanerini suliartornissaannut tamanna assut ilungersunarpoq. Aamma ilinniartunut 200-nut Ilimmarfiup atuakkanik atorniartarfianukarniartunut aamma ilinniakkeriartorniartunut ajorseriaataammat, Aage Rydstrøm-Poulsen allappoq.
