Ilisimatusarfiup qullersaqarfia tunualerpoq

Ilisimatusarfiup qullersaa, rektor Ole Marquardt, qullersallu tullia, prorektor Birgit Kleist, ullumi nalunaarput decembarimi Ilisimatusarfiup qullersaqarfianut toqqaasoqalerpat toqqagassanut ilaaniaratik.
Allattoq Elisa Isaksen
novembarip 15-at 2007 15:15

Aalajangernerat Ilisimatusarfiup aqunneqarnissaanut inatsimmut, Inatsisartut pingasunngormat akuerisaanut qisuariaataavoq.

- Siulersuisut qullersassamik toqqaanissaasa tungaannut qullersaasussap, inatsimmi ilisimasat aallaavigalugit sunniuteqarsinnaanermut tunngasunut apeqqusiivallaannginnissaa pissusissamisoortutut isigaara. Qullersaq ilisimatuutut misissuisarnermik misilittagaqarluartuussanersoq inatsimmi pineqartut ilagaat. Pissusissamisoornerussaaq aqutseriaatsimut nutaamut ikaarsaariartornissamut piffissaliunneqartoq taama sivikitsigisoq atorlugu naammassisassat naammassineqarsinaanerannik ilimaginnittumik qullersaqalernissaq, uangalu tamanna ilimaginngilara, Ole Marquardt oqarpoq.

Ole Marquardt Kulturi Inuiaqatigiillu pillugit ilisimatusarnermi pisortatut atorfiginikuusaminut utissaaq, Birgit Kleistilu Oqaasilerinermut, Atuakkialerinermut Tusagassiuuteqarnermullu immikkoortortami pisortatut sulilissalluni.

Ikaarsaariartornermi qullersassamik tullersortissaanillu decembarip ulluisa tallimaanni toqqaasoqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq