Ilisimatusarfiup internettia atornerlunneqartoq
Ilisimatusarfimmi ilinniartut, sulisut allallu Ilisimatusarfiup qarasaasianut attaveqarfiinut isersinnatitaasut allakkatigut nalunaarfigineqarput internetternerminni filinik agguaasseqatigiittarneq ilinniarnermut attuumassuteqanngitsunut atuisoqartarsimanera unitsinneqartariaqartoq.
Internettimut atttaviit atorlugit nittartakkat iserfigeqqusaanngitsut iserfigineqartassimapput, filminik internettikkut aallertoqartarsimalluni. Oqarasuaatit soorlu Iphonenit qarasaasiakkut atortorissaarutaanik internetti atorlugu data-nik aallertoqartarsimavoq. Atornerluineq Ilisimatusarfimmiit akuersaarneqanngilaq.
Ilisimatusarfiup internettiata atornerlunneqarsimanerata kingunerisaanik Ilisimatusarfiup internettiata atorneranut malittarisassat sukateqqinneqarput atuisullu oqaaqqissaarneqarput.
- Internet annertuallaamik atornerlunneqarsimasoq paasineqarpat atornerluisut mianersoqqussummik tunineqarsinnaapput, atornerluinerullu nassataanik Ilisimatusarfimut aningaasartuutaanerusut akilernissaannik peqquneqarsinnaallutik. Arlaleriarluni taamaaliortoqartillugu ilinniarfimmiit anisitaanermik kinguneqarsinnaavoq. Atornerluineq pinerlunnertut isikkoqarpat, taava suliaq politiinut suliassanngortinneqassaaq, Ilisimatusarfiup qarasaasiatigut attaveqarfiinik atuisuusut e-mailikkut taama allagarsipput.
Internettip atornerlunneqarnera Ilisimatusarfimmi sulisunut aamma ilinniartunut ulluinnarni internettimik atuiniarneranut ajornartorsiortitsisimavoq. Soorlu internetti atorlugu ilinniartitsisarneq unitsiinnartariaqarsimavoq internettip arriillivallaarnera pissutigalugu. Ilisimatusarfimmi rektori Tine Pars imatut nassuiaavoq:
- Internettimut aqutsinerput sukateriffiginikuuarput, atornerluinerup kingunerisimammagu ataqatigiimmik aaqqissuussinerup sunnerneqarnera. Atornerluisut assammi ataasiinnarmi kisinneqarsinnaapput. Qarasaasiakkut data-t annertoorujussuit nammineq soqutigisanut atorneqarsimapput aamma nittartakkani iserfigineqaqqusaanngitsuni filenik agguaasseqatigiittoqarsimalluni, rektor Tine Pars oqarpoq.
Ilisimatusarfiup ukiumut 720.000 koruunit internettimut atortarpai atuisullu tassaaput ilinniartut sulisullu. Ilisimatusarfiup internettianik atornerluisimasut saaffigineqareersimapput.
Rektorip oqaatigerusunngilaa internettimik atornerluisut ilinniartuunersut, sulisuunersut imaluunniit allatigut Ilisimatusarfimmut attuumassuteqarnersut.
Internettimik atornerluisimasunik maannamut politiinut unnerluussisoqarsimanngilaq, akiligassarsititsisoqarsimanani anisitsisoqarsimananilu.
